पाँचथरको फालेबुङ गाउँपालिका–५ प्राङबुङ (डाँडागाउँ)मा गरिवी निवारणका लागि लघु उद्यम विकास कार्यक्रम (MEDPA) यही चैत ३ देखि ४५ दिवसीय (२०७७ वैशाख १७ सम्म) होजियारी सीप विकास तालिम चलिरहेकोमा कोरोना भाइरसको महामारीका कारण केही समय स्थगित गरिएको छ ।

तालिम प्रशिक्षक श्रीमती शकुन्तला ओलीका अनुसार घरेलु तथा साना उद्योग विकास समिति पाँचथरको आर्थिक तथा प्राविधिक सहयोग एवम् कञ्चनजंघा महिला विकास केन्द्र ताप्लेजुङ र पाँचथरको संयुक्त आयोजनामा प्रशिक्षण कार्यक्रम शुरु भएको हो ।

गाउँघरमा सीप सिकाएर स्वरोजगार बनाउँदै लैजाने कार्यक्रमको लक्ष्यअनुसार ढाका, झोला, स्वीटर बुनाई, अदुवा, तरकारी, दलकुशन, पशुपालन आदि विषयमा जिल्लाको फिदिम नपा, फालेबुङ, हिलिहाङ र याम्बरक गाउँपालिकासमेत गरी जम्मा १५७ जना प्रशिक्षण कार्यक्रममा सहभागिता जनाइरहेका छन् ।

यसरी विभिन्न भेकका महिला भेला भई ती मध्येबाट केही सहभागी उद्यमी पनि बन्ने र त्यस्ता उद्यमीलाई आयोजक संस्थाबाट थप तालिम एवम् सहयोग उपलब्ध गराइने लक्ष्य रहेको पनि प्रशिक्षक ओलीले जानकारी दिइन् ।

कोरोना भाइरसको वर्तमान सन्त्रासबाट उम्किएपछि पुनः तिनै प्रशिक्षार्थीहरूलाई सोही स्थानमा भेला गरी तोकिएको अवधिभर प्रशिक्षण दिइने बताइएको छ ।

यसरी प्रशिक्षण प्रदान गर्नेहरूमा होजियारीतर्फ श्रीमती ओलीका अलावा ढाका बुनाईतर्फ पवित्रा लिम्बु, शर्मिला लिम्बु र एलिना तामाङ तथा झोला बुनाईतर्फ दिया लिम्बु रहेका छन् । जसमध्ये होजियारीको प्रशिक्षणमा सहभागी हुनेहरूमा रविना माङ्मु, निशा लिनाङ, सविना, इच्छामाया सावाँ, रोजिना थाम्सुहाङ, लीला सावाँ, रामकुमारी केरूङ, सुमित्रा सावाहाङ, जनिता राईलगायत छन् ।

फालेबुङ गाउँपालिका–५ मा भएको प्रशिक्षण कार्यक्रम शुभारम्भमा प्रशिक्षक ओलीका सहजकर्ता टकराज राई थिए भने कार्यक्रममा स्थानीय गाउँपालिका अध्यक्ष सञ्चबहादुर केरूङ र वडाध्यक्ष जीवनकुमार राईको पनि उपस्थिति रहेको थियो । प्रशिक्षण आरम्भ गराउँदै अध्यक्ष केरूङलगायतले प्रशिक्षार्थी तथा उद्यमीहरूले उत्पादन गरेका सबै सामग्रीहरू बिक्रीवितरण कार्यमा गाउँपालिकाले सहयोग गर्ने बचनबद्धता जनाएका थिए ।