नुवाकोट शिवपुरी गाउँपालिका–३ घर भई काठमाडौंको तारकेश्वर बस्दै आएकी ३७ वर्षीया सानुमाया लामालाई रामचन्द्र कुँवरले अमेरिका पठाइदिने प्रलोभन दिए । त्यसका लागि बैंक ब्यालेन्स देखाउनुपर्ने भनी चेपमा पारेर प्राइम बैंकका खाताबाहक बाग्लुङका कुँवरले आफ्नो खातामा साठी लाख रकम राख्न लगाई रकम राखेको भोलिपल्ट प्राइम बैंकको शाखा चावहिल, नयाँबानेश्वर, कोटेश्वर, सामाखुसी र इमाडोलबाट नक्कली कागजपत्र र नक्कली सवारीचालक अनुमतिपत्र राखी रकम निकाले । यस काममा उनलाई काभ्रेका ३४ वर्षीय गणेश लामाले पनि साथ दिए । त्यसपछि ठगीमा संलग्न यी दुवै सानुमायाबाट सम्पर्कविहीन भएर बसे ।
आफू ठगीमा परेको महसुस भएपछि सानुमायाले ठगीविरुद्ध प्रहरीमा जाहेरी दिइन् । यसरी साठी लाख ठगेर सम्पर्कविहीन भएको भन्ने प्राप्त जाहेरीका आधारमा महानगरीय अपराध महाशाखाबाट प्रहरी खटियो । प्रहरी टोलीले खोजतलास गर्दै जाने क्रममा आइतबार (४ फागुन) बेलुका भक्तपुरको ठिमीबाट दुवैलाई लुकीछिपी बसेको अवस्थामा फेला पारी नियन्त्रणमा लिएको छ ।
प्रहरीको प्रारम्भिक अनुसन्धानले ठगीमा संलग्न ती दुईले अन्य तीन व्यक्तिबाट समेत दश लाख ठगी गरेको पाइएको छ । प्रहरीले उनीहरूलाई हिरासतमा राखेर थप अनुसन्धान अघि बढाएको छ ।
प्रतिक्रिया