जेलमुक्त भएलगत्तै प्रतिबन्धित नेकपाका तीन जनाद्वारा पार्टी परित्याग

नेत्रविक्रम चन्द (विप्लव)ले नेतृत्व गरेको प्रतिबन्धित नेकपाका कास्की जिल्लास्तरीय तीन नेताले पार्टी परित्याग गरेको घोषणा गरेका छन् । विप्लव समूहका जिल्ला सदस्यद्वय लोकेन्द्र राई, बमबहादुर हितान मगर र सक्रिय सदस्य डिलबहादुर सुनारले सो पार्टीको हिंसात्मक गतिविधिप्रति असहमति रहेकाले पार्टीका सम्पूर्ण जिम्मेवारी छाडेको एक विज्ञप्तिमार्फत जनाएका छन् ।



उनीहरुले आइतबार (४ फागुन) जारी गरेको विज्ञप्तिमा शान्तिपूर्ण राजनीतिक कार्यक्रमले मात्र जनताको हित हुने भएकाले अबदेखि सत्तारूढ नेपाल कम्युनिष्ट पार्टी (नेकपा)मा आबद्ध भएर जनताको सेवा र हितमा काम गर्नेसमेत घोषणा गरिएको छ । विप्लव समूहमा आबद्ध रहेको अभियोगमा गत पुस २४ गते पोखरा महानगरपालिका–१४ चाउथेस्थित नयाँबस्तीबाट प्रहरीले तीनै जनालाई पक्राउ गरेको थियो ।

अदालतले गत माघ २२ गते सुनारलाई २० हजार र अन्यलाई जनही पाँच हजारका दरले धरौटीमा रिहा गर्न आदेश दिएकामा धरौटी बुझाउन नसकेकाले उनीहरु कारागार चलान भएका बताइएको छ ।

अदालतले तोकेको धरौटी आज बुझाएपश्चात् तीनै जनालाई गण्डकी प्रदेशसभा सदस्यसमेत रहेका नेकपाका गण्डकी प्रदेश कमिटी सदस्य रामजीप्रसाद बराल र अखिल नेपाल ट्रेड युनियन महासङ्घका केन्द्रीय सदस्य मङ्गल लिम्बूको रोहवरमा कारागारले मुक्त गरेको थियो भने कारागारबाट छुटेलगत्तै विज्ञप्तिमार्फत तीनैजनाले सो पार्टी परित्यागको घोषणा गरेका हुन् ।

pict: rss

प्रतिक्रिया