बुल्गेरियाले तीन रूसी नागरिकमाथि विष सेवन गराएर व्यक्ति हत्या गर्ने प्रयास गरेको आरोप लगाएको छ । बुल्गेरियाली अभियोजनकर्ताहरूले बिहीबार (२४ जनवरी) यसबारे जानकारी गराएका हुन् ।
उनीहरूमाथि हतियार निर्माता इमिल्यान गेब्रेव, उनका छोरा र कम्पनीका एक व्यवस्थापकलाई सन् २०१५ को अप्रिल २८ र मे ४ तारिखमा ‘अर्गानोफोस्फेट’ नामक विषाक्त तत्व सेवन गराई हत्या गर्ने प्रयास गरेको आरोप लागेको अभियोजनकर्ताहरूले एक विज्ञप्ति जारी गरी बताएका छन् ।
धेरैको जीवनलाई जोखिम गरेको अति बिषाक्त तत्वको प्रयोग गरी उनीहरूलाई हत्या गर्ने प्रयास गरिएको भए पनि समयमै उपचार हुँदा उनीहरूको जीवन बचेको थियो ।
आरोपित तीनै जना रूसी नागरिकको नाम विज्ञप्तिमा उल्लेख नगरिएको तर उक्त घटना बेलायतको सोल्जबरी आक्रमणका नामले चर्चित रूसी पूर्व गुप्तचर सेर्गेइ स्क्रिपाल र उनकी छोरीमाथिको रासायनिक आक्रमणसँग जोडिएको बताइएको छ ।
सन् २०१९ को फेब्रुअरीमा अनुसन्धानमूलक वेबसाइट बेलिङक्याटले आक्रमणमा तेस्रो व्यक्ति डेनिस भ्यास्चेस्लाभोभिच सेर्गिभ नामका रूसी सैन्य गुप्तचरका उच्च पदस्थ अधिकारी पनि जोडिएको हुनसक्ने उल्लेख गरिएको थियो ।
सेर्गिभ नक्कली रूसी राहदानीमा स्क्रिपाल र उनकी छोरी यूलियालाई रासायनिक आक्रमण गरिनुपूर्व (दुई दिन आगाडि) बेलायत पुगेको बेलिङक्याटले लेखेको थियो । उनी सन् २०१५ को फेत्र्रुअरी र अप्रिलमा बुल्गेरिया पुगेका थिए । सेर्गिभको बुल्गेरियाको दोस्रो भ्रमणको अन्तिम दिन गेब्रेभले सोफियामा गरेको स्वागत समारोहमा बेहोस भई लडेका थिए । एएफपीले जनाएअनुसार उक्त बिषको असर गेब्रेभका छोरा र उनका कम्पनीका कार्यक्रम व्यवस्थापकमा पनि देखिएको थियो, तर ती सबै जना केही समयको उपचारपछि निको भई घर फर्किएका थिए ।
प्रतिक्रिया