इन्डोनेसियाको पश्चिमी भूभागमा पर्ने रियाउ प्रान्तमा २० जना यात्रु सवार रहेको एक डुंगा दुर्घटना हुँदा कम्तीमा दशजना बेपत्ता भएको उद्धारकर्ताले बिहीबार जनाएका छन् ।

इन्डोनेसियाली कामदार बोकेर मलेसियातर्फ जान लागेको सो डुंगा बुधबार साँझ रुपाट टापुनजिक डुबेको प्रान्तीय खोजी तथा उद्धार कार्यालयका प्रमुख इसक ताहिरले बताए । स्थानीय नाविकले उद्धार गरेपछि १० जना कामदार दुर्घटनाबाट बचेका छन् ।

हराएका यात्रुको खोजी भइरहेको छ । उद्धारकार्यमा सुरक्षाकर्मी र उद्धार कार्यालयका कर्मचारी लागेका छन् । त्यसैगरी मलेसियाबाट पनि उद्धारकर्मीको सहभागिता रहेको जनाइएको छ ।

खराब मौसमका कारण दुर्घटना भएको बताइएको छ । इन्डोनेसियाको विशाल द्वीपहरूमा आवतजावतका लागि यातायातको प्रमुख साधन डुंगा नै भएको तर सुरक्षा मापदण्डको अभावमा बारम्बार समुद्रमा दुर्घटना हुने गरेको सिन्ह्वाले जनाएको छ ।