बहुचर्चित एवं बहुप्रतीक्षित एकीकृत भन्सार जाँचचौकी (विराटनगर) मङ्गलबार (७ माघ)देखि सञ्चालनमा आउने भएको छ । सो चौकी निर्माण सम्पन्न गरी भारत सरकारले नेपाल सरकारलाई हस्तान्तरण गरेपछि सञ्चालनमा आउन लागेको हो ।

प्रधानमन्त्री केपी शर्मा ओलीले काठमाडौं र उहाँका भारतीय समकक्षी नरेन्द्र मोदीले दिल्लीमा मङ्गलबार एकै समयमा ‘स्वीच अन’ गरी चौकीको शुभारम्भ गर्ने कार्यक्रम रहेको उद्योग, वाणिज्य तथा आपूर्ती मन्त्रालय, वाणिज्य, आपूर्ति तथा उपभोक्ता संरक्षण मञ्च कार्यालयका प्रमुख हिमाल बराललाई उद्धृत गर्दै राससले जनाएको छ ।

विराटनगर भन्सार कार्यालयदेखिपूर्व भारत सिमानासँग जोडिएको बुधनगरमा सो चौकी १२९ बिघा क्षेत्रमा तयार गरिएको छ । चौकी निर्माण गर्न भारत सरकारसँग सन् २००६ मै सम्झौता भए पनि यसको निर्माण सन् २०१६ देखि शुरु भएको थियो । भारत अहमदावादका दिनेशचन्द्र आर अग्रवालले भारतीय रुपैयाँ एक अर्ब १४ करोड लागतमा निर्माण गर्न ठेक्कामा लिएका थिए ।

विराटनगर भन्सार कार्यालयबाट हुने सबै काम एकीकृत जाँचचौकीबाट शुरु भएपछि विराटनगर रानीसँग जोडिएर रहेको जोगबनी बजार पनि सहज हुने र सवारीको चाप स्वतः घट्ने अनुमान गरिएको छ । भन्सार अधिकृत मणिराम पौडेलका अनुसार जाँचचौकी सञ्चालनमा आउँदा धेरै कुरामा सहज हुनेछ ।