प्रधानमन्त्री केपी शर्मा ओलीले नेपालमा हिजो सम्पन्न १३औँ दक्षिण एसियाली खेलकुद (साग)मा पदक जित्ने नेपाली खेलाडीलाई बधाई दिन प्रधानमन्त्रीको सरकारी निवास बालुवाटारमा आमन्त्रण गरेका छन् ।

१३औँ सागमा सहभागिता जनाई राष्ट्रलाई स्वर्ण, रजत र कांस्य पदक दिलाउने खेलाडीलाई बधाई दिन प्रधानमन्त्री ओलीले आज (बुधबार) अपराह्न २ः१५ बजे बालुवाटारमा आमन्त्रण गरेको प्रधानमन्त्रीका प्रेस सल्लाहकार सूर्य थापाले सामाजिक सञ्जालमार्फत जनाएका हुन् ।

प्रधानमन्त्री ओलीले सो अवसरमा खेलाडीलाई विशेष सम्बोधन गर्ने पनि जनाइएको छ । कार्यक्रममा प्रधानमन्त्री ओलीले पदक विजेता खेलाडीलाई आकर्षक आर्थिक प्याकेजको घोषणा गर्ने बालुवाटार स्रोत बताउँछ ।

नेपालले आयोजना गरेको १३औँ सागमा नेपाल ५१ स्वर्ण पदक जित्दै दोस्रो भएको थियो । यो सागमा नेपालले ५१ स्वर्ण, ६० रजत र ९५ कांस्य गरी समग्रमा २०६ पदक प्राप्त गरेको थियो ।