नेपाली कांग्रेसका सभापति शेरबहादुर देउवाले सरकारले न्यायालय, सञ्चारलगायत क्षेत्रका अधिकार एकपछि अर्को गर्दै खोस्दै गएको आरोप लगाएका छन् ।
शुक्रबार पोखरामा नेपाल डेमोक्र्याटिक लयर्स एसोसिएसनको वार्षिक साधारणसभाको उदघाटन गर्दै देउवाले सरकारले संवैधानिक परिषदलाई पनि कठपुतली बनाउन खोजेको आरोप लगाए । सो अवसरमा उनले सहमति र प्रजातान्त्रिक मूल्यमान्यताविपरीत अध्यादेश ल्याउन खोजिएको भन्दै जबर्जस्ती गरे नेपाली कांग्रेस सडकमा जानसमेत पछि नपर्ने बताए ।
सो अवसरमा उनले सरकारले संवैधानिक आयोगमा आफ्ना मान्छे भर्ती गरेको आरोप लगाए । सरकारको यो रवैया आफ्नो पार्टीका लागि स्वीकार्य नहुने उनको भनाइ थियो । देउवाले भने, ‘अख्तियारलगायत संवैधानिक आयोगमा आफ्ना मान्छे भर्ना गरी सरकारले शाही आयोगजस्तो बनाउन लागेको छ । कम्युनिस्ट सरकारले जनताका सबै अधिकार खोस्न लागेको छ । हामी कुनै हालतमा छाड्ने छैनौँ ।’
भारतले हालै जारी गरेको राजनीतिक नक्साबारे सरकारले कुनै प्रतिवाद गर्न नसकेको देउवाको भनाइ थियो । देउवाले प्रधानमन्त्री केपी ओलीको राष्ट्रवाद चुनाव जित्ने एउटा राम्रो नाटक मात्र भएको बताए । उनले प्रधानमन्त्री ओलीको राष्ट्रवाद अहिले कालापानीमा पुगेर लम्पसारवादमा परिणत भएको उनले आरोप लगाए ।
प्रतिक्रिया