राप्रपामा कावाअध्यक्षको जिम्मेवारी तामाङलाई

राप्रपामा कावाअध्यक्षको जिम्मेवारी तामाङलाई


राष्ट्रिय प्रजातन्त्र पार्टीले वरिष्ठ उपाध्यक्ष बुद्धिमान तामाङलाई कार्यवाहक अध्यक्षको जिम्मेवारी दिएको छ ।

अमेरिकाको वासिंगटन डिसीमा आउँदो डिसेम्बर ४–६ सम्म हुने इन्टरनेसनल डेमोक्र्याटिक युनियन फोरम र प्रवासी नेपाली एकता समाजले गर्ने विभिन्न कार्यक्रममा सहभागी हुन पार्टीका अध्यक्ष कमल थापा बुधबार अमेरिका प्रस्थान गरेकाले पार्टीको दैनिक कार्यसम्पादन गर्न तामाङलाई जिम्मेवारी दिइएको पार्टीका सहायक महामन्त्री राजाराम बर्तौलाले जानकारी दिए ।

पार्टीद्वारा जारी गरिएको विज्ञप्तिमा नेपालको भूभागसमेतलाई समेट्ने गरी हालै भारतबाट एकतर्फी रूपमा सार्वजनिक गरेको नक्सा त्रुटिपूर्ण रहेकाले सञ्चाउन माग गरिएको छ । उक्त विज्ञप्तिमा सुगौली सन्धिबाट कायम रहेको कालीनदीपूर्वको नक्सा प्रकाशित गरिएको र सोबाट यसअघि नेपाल र भारत सरकारबीच सीमा विवाद समाधानका सम्बन्धमा गठन गरिएको सचिवस्तरिय संयन्त्रसमेतलाई अवमूल्यन हुन गई नेपाल–भारतबीचको सम्बन्धमा संशय पैदा हुन गएको विषयलाई पार्टीले अत्यन्त गम्भीरतापूर्वक लिएको जनाइएको छ ।

दुई घनिष्ट छिमेकीका बीचमा संशय पैदा हुनु र संशय कायम रहिरहनु निश्चित रूपमा दुवै देशको हितमा नहुने उल्लेख गरिएको उक्त विज्ञप्तिमा भारतबाट प्रकाशित राजनीतिक नक्सामा भएको त्रुटि सच्याउन र नेपालको भूभागको संरक्षण गर्न अविलम्ब कूटनीतिक पहल गर्न नेपाल सरकारसमक्ष राप्रपाले जोडदार माग गरेको छ ।

यसैबीच राष्ट्रिय प्रजातन्त्र पार्टी (संयुक्त) ले हिन्दू राष्ट्र स्थापनाको माग गर्दै जनकपुरको जानकी मन्दिरबाट बिहीबार रथयात्रा शुरु गर्न लागेको जनाएको छ । धनुषा महोत्तरी, सर्लाही बारा, पर्सा, मकवानपुर, चितवन हुँदै आगामी मंसिर ४ गते लुम्बिनीमा आएर सो रथयात्रा सम्पन्न गरिने नेता सुन्दर पाण्डेले जानकारी दिए ।

यात्राका क्रममा जलेश्वर, गौर, कलैया, चितवन, कावासोती, भैरहवामा राजनीतिक सभा गरिने जनाइएको छ ।

rss