त्रिभुवन विश्वविद्यालयले दीक्षान्त समारोहमा सहभागी हुनका लागि अनलाइन फाराम आह्वान गरेपछि दीक्षित हुने विद्यार्थीको संख्या बढेको पाइएको छ । त्रिविले गत वर्षदेखि अनलाइन फारामको व्यवस्था गरेदेखि दीक्षित हुने विद्यार्थीको संख्यामा वृद्धि भएको हो ।

यस वर्ष हुने ४५औँ दीक्षान्त समारोहमा १० हजार १७८ विद्यार्थीले दीक्षितका लागि आवेदन दिएको दीक्षान्त मूल समारोह समितिका सदस्य सचिव पशुपति अधिकारीले जानकारी दिइ । गत वर्ष नौ हजार ५०४ विद्यार्थी दीक्षित भएका थिए । ‘अनलाइनबाट फाराम भर्न थालेपछि दीक्षित हुने विद्यार्थीको संख्यामा पनि वृद्धि भएको छ,’ उनले भने, ‘गत वर्षभन्दा यस वर्ष हजार विद्यार्थी बढीले आवेदन दिएका छन् ।’ पहिले त्रिविस्थित परीक्षा नियन्त्रण कार्यालयमा आएर विद्यार्थीले आवेदन दिने गर्दथे ।

उनका अनुसार अनलाइनमा फाराम भर्नुभन्दा अगाडि करिब सात हजारको संख्यामा विद्यार्थी दीक्षान्त समारोहमा सहभागी हुने गरेका थिए । आवेदन दिएको उजुरीमाथि सुनुवाइ गरी त्रिविले अन्तिम नामावली प्रकाशन गर्ने गर्दछ । सन् २०१८ जुन १५ देखि २०१९ जुन १४ सम्म लब्धांक पत्र (ट्रान्सक्रिप्ट) लिएका विद्यार्थी समारोहमा सहभागी हुन पाउने व्यवस्था रहेको छ ।

सदस्यसचिव अधिकारीका अनुसार त्रिविले ७० हजार ७० विद्यार्थी समारोहमा समावेश गरेको थियो, तर तीमध्ये सात गुणा कम अर्थात् १० हजार विद्यार्थी मात्र सहभागी हुने भएका छन् । आगामी पुस ३ गते हुने समारोहमा ६ हजार नौ सय अभिभावकसमेत सहभागी हुने सदस्यसचिव अधिकारीले बताए । सहभागी प्रतिअभिभावकका लागि रु. ३०० तोकिएको छ ।

त्रिविले स्नातक तहका लागि रु. दुई हजार दुई सय, स्नातकोत्तर तहका लागि रु. दुई हजार सात सय र एमफिल (दर्शनाचार्य) र पीएचडी (विद्यावारिधि)का लागि रु. तीन हजार दुई सय शुल्क तोकेको छ भने गाउन, स्कार्फ र टोपीका लागि रु. एक हजार पाँच सय धरौटी तोकिएको छ ।

दीक्षान्त समारोहमा सबैभन्दा बढी व्यवस्थापन संकायका विद्यार्थीले आवेदन दिएका छन् । व्यवस्थापन संकायका विद्यार्थी तीन हजार सात सय २० सहभागी हुने भएका छन् । यस्तै मानविकी संकायका दुई हजार एक सय ४४, इन्जिनियरिङतर्फ एक हजार एक सय ९०, विज्ञान संकायतर्फ एक हजार एक सय नौ, चिकित्सातर्फ आठ सय ८०, शिक्षा संकायमा सात सय ८३, कानून संकायमा एक सय ८६, कृषितर्फ एक सय ३३ र वन विज्ञानतर्फ ३३ विद्यार्थीले सहभागीका लागि आवेदन दिएका छन् ।

यसैगरी त्रिवि ४५औँ दीक्षान्त समारोहका लागि मूल समारोह समिति गठन गरिएको छ । त्रिविका रजिष्ट्रार डिल्लीराम उप्रेतीको अध्यक्षतामा ४६ सदस्यीय समिति गठन गरिएको छ । समितिको उपाध्यक्षमा त्रिविका परीक्षा नियन्त्रक पुष्पराज जोशी र सदस्यसचिवमा परीक्षा सहनियन्त्रक पशुपति अधिकारी रहरेका छन् ।
रासस