मंगलबारदेखि नेपालको चारदिने भ्रमणमा रहेका बंगलादेशका राष्ट्रपति मोहम्मद अब्दुल हमिद बुधबार राजनीतिक भेटघाटमा व्यस्त रहने भएका छन् ।

यसैक्रममा हमिद र नेपाल कम्युनिष्ट पार्टी (नेकपा) का दोस्रो वरीयताका अध्यक्ष पुष्पकमल दाहाल ‘प्रचण्ड’बीच भेटवार्ता भएको छ ।

मंगलबारदेखि चारदिने नेपाल भ्रमणमा रहेका बंगलादेशका राष्ट्रपति हमिदलाई भेट्न प्रचण्ड बुधबार बिहान उनी बसेको होटेल म्यारियट पुगेका थिए ।

प्रचण्डभन्दा अघि हमिदलाई भेट्न राष्ट्रिय सभा अध्यक्ष गणेशप्रसाद तिमल्सिना पनि सोही होटेलमा पुगेका थिए ।

आजै २ बजे प्रमुख प्रतिपक्षी दल नेपाली कांग्रेसका सभापति शेरबहादुर देउवाले राष्ट्रपति हमिदसँग शिष्टाचार भेटवार्ता गर्ने कार्यक्रम तय भएको छ भने २ः४० मा प्रधानमन्त्री केपी शर्मा ओली र राष्ट्रपति हमिदबीच शिष्टाचार भेटवार्ता हुने कार्यक्रम रहेको छ ।

हमिदले आजै अपराह्न साढे ४ बजे राष्ट्रपति विद्यादेवी भण्डारीसँग भेटवार्ता गर्ने कार्यक्रम रहेको छ । राष्ट्रपति भण्डारीसँगको भेटवार्तापछि राष्ट्रपति हमिद उनकै सम्मानमा आयोजित रात्रिभोजमा सहभागी हुनेछन् । हमिदको सम्मानमा राष्ट्रपति भण्डारीले दरबारमार्यस्थित होटेल याक एण्ड यतीमा साँझ साढे ६ बजे रात्रिभोजको आयोजना गरेकी छिन् ।