हाउजिङ व्यवसायमार्फत ठगी गरेको आरोपमा त्रिभुवन अन्तर्राष्ट्रिय विमानस्थलबाट बिहीबार साँझ पक्राउ परेका पूर्वअर्थ राज्यमन्त्री तथा व्यापारी रूप ज्योति र उनकी छोरी सुरुचिलाई तीन दिन थुनामा राखेर अनुसन्धान गर्न अदालतले म्याद दिएको छ ।

थुनामा राखेर अनुसन्धान गर्न माग गर्दै महानगरीय प्रहरी परिसर काठमाडौंले उनीहरू दुवैलाई जिल्ला अदालत काठमाडौं लगेपछि अनुसन्धानका लागि अदालतले तीन दिनको म्याद दिएको हो ।

ज्योतिले हाउजिङका नाममा विभिन्न व्यक्तिलाई ठगी गरेको मुद्दामा काठमाठौं जिल्ला अदालतले ०७५ मंसिर २० मा पक्राउ गर्न अनुमति दिएको थियो । तर, त्यसविरुद्ध ज्योति सर्वोच्च पुगेका थिए । सर्वोच्च पुगेको करिब १ वर्षपछि गत मंगलबार सर्वोच्च अदालतले रुप ज्योति र सुरुचिलाई पक्राउका लागि प्रहरीलाई अनुमति दिएको थियो ।

ज्योतिले व्यक्तिका नाममा दिनुपर्ने जग्गा अर्कै कम्पनी खडा गरी कम्पनीकै नाममा गराएका थिए । उक्त कम्पनी ज्योतिकी श्रीमती र छोरीको नाममा रहेकोले छोरीलाई पनि पक्राउ गरिएको प्रहरीले जनाएको छ ।