मंसिरमा हुने उपनिर्वाचनका लागि उम्मेदवार छनोट गर्न नेपाली कांग्रेसको पदाधिकारी बैठक पार्टी सभापति शेरबहादुर देउवाको निवास बुढानिलकण्ठमा बसेको छ । पदाधिकारी बैठकले प्रदेशसभा निर्वाचन क्षेत्र र स्थानीय तहबाट पार्टीका सम्बन्धित निकायले सिफारिस गरी पठाएका नामावलीमाथि छलफल गरी टुंगो लगाउने बुझिएको छ ।

कांग्रेस केन्द्रीय कार्यालयका मुख्य सचिव कृष्णप्रसाद पौडेलले दिएको जानकारीअनुसार पदाधिकारी बैठकमा समसायिक राजनीति, उपनिर्वाचनमा पार्टीको तयारी, पार्टीका केन्द्रीय विभाग गठनलगायतका विषयमा समेत छलफल हुनेछ । तर, शीर्ष तहका केही नेताले उम्मेदवार छनोटबाहेकका एजेण्डामा आज छलफल नहुने अभिव्यक्ति दिएका छन् ।

ज्ञातव्य छ, आगामी मंसिर १४ गते ३७ जिल्लाका विभिन्न रिक्त पदमध्ये प्रतिनिधिसभा सदस्य एक, प्रदेशसभा सदस्य तीन तथा स्थानीय तहका प्रमुख एक, अध्यक्ष तीन, उपाध्यक्ष एक र वडाध्यक्ष ४३ गरी जम्मा ५२ पदका लागि निर्वाचन हुँदै छ।

उपनिर्वाचन हुने जिल्ला, प्रदेशसभा निर्वाचन क्षेत्र र स्थानीय तहबाट कांग्रेसका सम्बन्धित सबै निकायले उम्मेदवारको नाम सिफारिस गरिसकेका छन् ।