फिलिपिन्सका नौ हजार प्रहरीलाई कारबाही

फिलिपिन्सका नौ हजार प्रहरीलाई कारबाही


फिलिपिन्समा पछिल्ला केही वर्षमा नौ हजारभन्दा बढी प्रहरीलाई कारवाही भएको सम्बद्ध अधिकारीहरुले जनाएका छन् ।

फिलिपिन्सको राष्ट्रिय प्रहरीले सन् २०१६ को जुन ३० देखि अहिलेसम्म ९ हजार १ सय ७२ जना प्रहरीलाई कारबाही गरिएको जनाएको हो ।

कारबाहीमा परेका प्रहरीको संख्या कुल प्रहरीको संख्याको ४.७ प्रतिशत रहेको पनि प्रहरी उच्च अधिकारीहरुले जानकारी दिएका छन् । कार्यवाहक प्रहरी प्रमुखद्वारा सोमबार आयोजित पत्रकार सम्मेलनमा दिएको जानकारीलाई उद्धृत गर्दै सिन्ह्वाले जनाएअनुसार खराब तथा भ्रष्ट प्रवृत्तिका कारण ती प्रहरीहरू कारबाहीमा परेका हुन् ।

प्रहरीका लेफ्टिनेन्ट जनरल फ्रान्सीस्को गाम्बोआले कारबाहीमा परेकामध्ये दुई हजार ८०६ जनालाई सेवाबाटै निस्कासन गरिएको जानकारी दिए । त्यसैगरी अरु ५३५ जनलाई घटुवा गरिएको, ४७ सय २१ जनालाई निलम्बन गरिएको, ७ सय ६२ जनालाई नसियत दिइएको, ६० जनालाई चार महिनाका लागि निस्कासन गरिएको, २०८ जनाको तलब रोक्का गरिएको र ८० जनालाई अधिकारविहीन गराइएको उनले बताए ।

निस्कासनमा परेकामध्ये केही प्रहरी लागुऔषधको कारोबारमा संलग्न भएको पाइएको गोम्बोआले जानकारी दिए । उनका अनुसार सन् २०१९ को नौ महिनामा मात्रै २२ सय ८६ जनामाथि यसैखालका कारबाही भएका छन् ।

फिलिपिन्समा सरकारले लागूऔषधविरुद्धको कारबाही अभियानलाई तीव्रता दिइरहेको छ भने त्यसमा संलग्न देखिएका प्रहरी तथा अन्य सरकारी अधिकारीहरू पनि कारबाहीमा परेका हुन् ।