ह्यान्डबलकी राष्ट्रिय खेलाडी साधना वमले १३औँ दक्षिण एसियाली खेलकुद प्रतियोगिताअन्तर्गत भएको अन्तिम छनोटमा ‘राजनीति’ भएको भन्दै राष्ट्रिय खेलकुद परिषदमा निवेदन दर्ता गरेकी छिन् । साधनाले अन्तिम छनोटमा राजनीति घुसेको, शक्तिको आधारमा आफुभन्दा कमजोर, खुट्टा भाँचिएका खेलाडी देवकुमारीलाई छनोटकर्ताले चयन गरेको भन्दै त्यसविरुद्ध राखेपमा निवेदन दर्ता गरेकी हुन् । साधनाले गत आइतबार (३ कात्तिक) राखेपमा निवेदन दर्ता गराएकी हुन् ।
खुट्टा भाँच्चिएर विगत लामो समयदेखि बन्द प्रशिक्षण र अन्तिम छनोटमा नआएकी खेलाडी देवकुमारी छनोटकर्ताले छनोट गर्दै साधना वैकल्पिक खेलाडीको रुपमा छनोटकर्ताले चयन गरेपछि साधनाले आफुमाथि अन्याय भएको भन्दै आवश्यक छानविनका लागि राखेपमा निवेदन दर्ता गरेकी हुन् । यदि राखेपले निष्पक्ष रुपमा छानविन नगरे न्यायको लागि अदालतसमेत जाने साधनाले बताइन् ।
खेल्न असमर्थ र छनोट चरणमा समेत नआएकी खेलाडीलाई चयनकर्ताले छनोट गर्दै आफुलाई वैकल्पिक खेलाडीको बिल्ला भेराएपछि एकदमै चित्त दुःखेर सम्बन्धित निकाय (राखेप)मा निवेदन दिन आएको साधनाको भनाई छ ।
‘मभन्दा राम्रो खेलाडीको छनोट भएको भए म यहाँ आउने थिइनँ, यहाँ त खुट्टा भाँच्चिएर खेल्न असमर्थ र अन्तिम छनोटमा समेत उपस्थित नभएकी खेलाडीलाई कसरी छनोट गरियो, त्यसको छानविन गराउन आएकी हुँ’, उनको जिकीर छ ।
साथै अन्तिम छनोट गर्दा छनोटकर्ताले एकजना विदेशी प्रशिक्षक मात्र राखेको बताइन् । छनोटकर्ताले नेपाली प्रशिक्षक कृष्ण शाक्य र विन्दा थापालाई खेलाडी छनोट गर्दा सामेल नगरेको खुलासा समेत उनले गरिन् ।
‘साह्रै चित्त दुःख्यो सर, निकै नरमाइलो लाग्यो र अपमानित भएको महसुस भएर न्याय पाउनको लागि राखेपमा निवेदन दिएँ’– साधनाले घटना र विचारसँग दुःखेसो पोखिन् । उनी गत साउन २१ देखि असोज ३० गतेसम्म ह्यान्डबलको बन्द प्रशिक्षणमा रहेकी थिइन् । शुभारम्भमा २५ खेलाडीबाट शुरु भएको ह्यान्डबलको बन्द प्रशिक्षण त्यसपछि २१ र अन्तिम १६ खेलाडी छनोंट गरि टुङ्गीएको थियो । साधना अन्तिम २१ परे पनि अन्तिम १६ मा भने अटाउन सकिनन् । उनी ९ मिटर सुटरतर्फ उत्कृष्ट खेलाडी हुन् । भारतको गुवाहटी र सिलोनमा सम्पन्न १२औँ दक्षिण एसियाली खेलकुद प्रतियोगिता (साग)मा साधना राष्ट्रिय ह्यान्डबल टोलीको सदस्य थिइन् ।
ह्यान्डबलको अन्तिम छनोटमा भएको धाँधली सम्बन्धमा नेपाल ह्यान्डबल संघका अध्यक्ष तेज गुरुङसँग सम्पर्क गर्दा उनले यो सबै प्राविधिक कुरा हो, संघले यसमा हस्तक्षेप गर्दैन भन्ने जवाफ दिए । साथैै अध्यक्ष गुरुङले अन्तिम छनोटमा कुनै किसिमको धाँधली नभएको प्रस्ट पार्दै ‘पोजिसन’का कारण साधना टिममा पर्न नसकेको खुलासा गरे । साधनाको पोजिसनमा साधनाभन्दा अन्य राम्रा खेलाडी भएका कारण उनी छनोटमा पर्न नसकेको गुरुङले बताए ।
तर, अध्यक्ष गुरुङको प्रतिक्रियाको प्रतिवाद गर्दै साधनाले भनिन्– ‘अध्यक्षज्यूले जुन पोजिसनको कुरा गर्नु भो त्यो अहिले भएको छनोट प्रक्रिया मिलेको छैन । साथै कुनैमा एक, कुनैमा दुई र कुनैमा तीन खेलाडी कसरी हुन्छ ? त्यसको जवाफ अध्यक्ष गुरुङले दिनुपर्छ ।’
‘यो सब आफ्ना खेलाडीलाई टिममा पार्न मिलेमतोमा गरिउको घृणित खेल हो, जसको पर्दाफास राखेपले गर्नुपर्छ । राम्रो खेलाडीले खेल्ने अवसर पाउनुपर्छ भने असक्षम खेलाडी टिमबाहिर पर्नुपर्छ, मेरो आवाज यही हो’, साधनाको प्रष्टोक्ति छ ।
प्रतिक्रिया