१३औँ सागको लागि पौडी खेलाडीको छनोट हुँदै





नेपालमा हुने १३औँ दक्षिण एसियाली खेलकुद (साग)अन्तर्गत पौडी खेलमा सहभागि हुने खेलाडीहरुको अन्तिम छनोट आज (भदौ २४ र २५) हुँदैछ । पौडी खेलाडीहरुको छनोट नवौं एनएसए कप पौडी प्रतियोगिताबाट हुनेछ । प्रतियोगिता सम्पन्न गर्न नेपाल पौडी संघले संघका कोषाध्यक्ष नाजिर उद्दिन मुस्लिमको संयोजकत्वमा प्रतियोगिता आयोजक समिति गठन गरेको छ ।

छनोटमा १ सय ५० पुरुष र १ सय महिला गरी करिब २ सय ५० खेलाडीको सहभागिता रहने छ । पुरुष÷महिलामा समान १४–१४ गरी २८ स्पर्धामा प्रतिस्पर्धा हुने छ । १६ पुरुष र १२ महिला गरी २८ खेलाडी छनोट गरिने संयोजक मुस्लिमले जनाएका छन् ।

उक्त प्रतियोगितामा पुरुष र महिलातर्फ ५०, १ सय, २ सय र ४ सय मिटर फ्रिस्टाइल, ५०, १ सय र २ सय मिटर ब्रेस्टस्ट्रोक, वटरफ्लाई र व्याकस्ट्रोक तथा २ सय मिटर इन्डिभिज्युल मिड्ले इभेन्टहरु सञ्चालन हुनेछन् । खेलाडी छनोट फिना अंक आधारमा गरिने छ ।

छनोट बाहेक उमेरसमूहका खेलाडीहरुलाई प्रोत्साहन गर्ने उद्देश्यले १० वर्ष, १२ वर्ष, १४ वर्ष र १७ वर्ष मुनि उमेरसमूहको छुट्टै प्रतिस्पर्धा समेत हुनेछ ।

प्रतिक्रिया