जापानको टोकियोमा अगस्ट १९ मा सम्पन्न विभिन्न क्षेत्रमा विज्ञता हासिल गरेकाहरूलाई पुरस्कृत गर्ने शिलशिलामा नेपाली खेलक्षेत्रमा महिला रेश्लरको रुपमा परिचित अस्मिता सुनार (जुरेली)लाई पनि सम्मानसहित अवार्ड प्रदान गरिएको छ ।

नेपालबाट जापान पुगेर विभिन्न पेशा व्यवसाय अँगालेर बसेका व्यक्तित्वहरूको पहलमा यो अवार्ड आयोजना भएको हो । विगत ७ वर्षदेखि रेस्लिङ खेलमा आबद्ध रहेर आफु पनि खेल्दै र अरुलाई पनि खेलाउँदै आएकी अस्मिता (जुरेली) यो सम्मान पाउँदा खुशी प्रकट गरेकी छिन् ।

जापानमै गएर यो अवार्ड थापेको स्वर्णिम पलको स्मरण गर्दै अस्मिताले भनिन्– ‘उमेर छँदै सम्मान र पुरस्कार पाए । आफ्नो कामको कदर भएकोमा अत्यन्त खुशी छु । अझ जापानमै आएर अवार्ड थाप्नुको आनन्द शब्दमा व्यक्त गर्न सक्तिनँ । म अत्यन्त खुशी आनन्दित छु, यो सम्मानले अझ काम गर्ने हौसला बढेको छ ।’

अगस्ट १९ का दिन जापानको टोकियोमा सम्पन्न उक्त कार्यक्रममा विभिन्न संघसंस्थामा ाबद्ध भएका व्यक्तिहरूलाई अवार्ड वितरण गरिएको हो । कार्यक्रममा प्रमुख अतिथि नेपाली व्यवसायी संघ जापानका अध्यक्ष विजय थकाली रहेका थिए ।