नेपाल ओलम्पिक कमिटीको साउन २० गते सोमबार बसेको विशेष साधारणसभाले नेपाल ओलम्पिक कमिटीको निर्वाचन भदौ २० गते गर्ने निर्णय गरेको छ । उक्त निर्णय नेपाल ओलम्पिक कमिटीका अध्यक्ष जीवनराम श्रेष्ठको अध्यक्षतामा बसेको साधारण सभाको बैठकले गरेको हो ।
निर्वाचनको लागि एनओसीले अन्तर्राष्ट्रिय ओलम्पिक कमिटी (आईओसी) र ओलम्पिक कमिटी अफ एसिया (ओसिए) लाई पत्राचार गरेको थियो । दुवै कमिटीले भदौ २० गतेलाई स्वीकृति प्रदान गरेपछि एनओसीले निर्वाचनको मिति भदौ २० गते तोकेको हो ।
सो साधारणसभाले निर्वाचन सम्पन्न गर्न तीन सदस्यीय निर्वाचन समिति पनि गठन गरेको छ । समितिको संयोजकमा बरिष्ठ अधिवक्ता लोकभक्त राणा रहेका छन भने सदस्यहरुमा सुरेन्द्र थापा र राधिका खतिवडा रहेका छन् ।
त्यस्तै उक्त विशेष साधारणसभाले विधान संसोधन गर्दै १७ सदस्यीय कार्यसमितिलाई परिवर्तन गर्दै १९ सदस्यीय बनाएको छ । संसोधित विधान अनुसार अव एनओसीमा पाँच उपाध्यक्ष रहनेछन् । यसअघि चार उपाध्यक्षको व्यवस्था थियो । त्यस्तै तीन सचिव पनि थप गरिएको छ ।
विगतमा एक मात्र सचिव रहेकोमा संसाधित विधानमा दुईवटा सदस्य कटौति गर्दै सचिवको संख्या बढाएको हो । यसअघि एनओसीको कार्यसमितिमा नौं सदस्य रहेपनि अव सात मात्र कायम गरिएको छ ।
त्यस्तै मानर्थ अध्यक्ष रुपमा निवर्तमान अध्यक्षलाई बनाउने प्रावधान भएपनि त्यसमा पनि संसोधन गरिएको छ । जसअनुसार अब जो कोही पूर्वअध्यक्षलाई मानार्थ अध्यक्ष बनाउन सकिने छ ।
प्रतिक्रिया