भोटेवहाल तयारी पोशाक उत्पादक तथा बिक्रेता संघले सरकारको साथ नपाएको गुनासो गरेका छन् । सरकारले सहयोगभन्दा पनि चौतर्फी रुपमा हमला गर्दै आएकोप्रति उनिहरु चिन्तित भएका हुन् ।
शनिबार संघको चौथो बार्षिक साधारण सभा तथा तेस्रो अधिवेशनको उद्घाटन सत्रमा बोल्दै संघमा आवद्ध व्यवसायीहरुले दक्ष कालिगढ र कच्चा पदार्थको अभाव हुँदा पनि व्यवसायी टिकाएर राखेको बताए । संघका अध्यक्ष चन्द्रबहादुर लामिछानेले बढ्दो घरबहा कर, कालिगढलाई तालिम, उद्योग दर्तामा सरकारी ढिलासुस्ती, कच्चापदार्थ आयातमा सरकारी अंकुश, उच्च भन्सार मूल्य र बिचौलियाका कारण साना उद्योग टिकाउन मुश्किल रहेको बताए ।
कार्यक्रमका प्रमुख अतिथी समेत रहेका काठमाडौं महानगरपालिकाका मेयर विद्यासुन्दर शाक्यले आफूहरु व्यवसायीको पक्षमा रहेको भन्दै समस्या भए सहयोग गर्ने बताए । व्यवसायीहरुले न्यूरोड क्षेत्रमा सुरु गरिएको ‘स्मार्ट पार्किङ’ ले आफूहरुलाई मार परेको भन्दै तत्काल हटाउन माग गरिरहेका बेला मेयर शाक्यले पुनःबिचार गर्ने बताएका थिए । उनले व्यसायीहरुलाई न्यूरोड क्षेत्रको सडक जाम गर्ने गरी व्यवसाय नगर्न अनुरोध गरेका थिए ।
यस्तै कार्यक्रमका बिशेष अतिथि समेत रहेका नेपाल राष्ट्रिय व्यवसायी महासंघका अध्यक्ष नरेश कटुवालले महानगरकै अव्यवहारिक निर्णयका कारण आम व्यवसायीले सास्ती भोग्नुपरेको बताए । उनले नेपालमा अहिले कृषि, निर्माण र उत्पादनमूलक उद्योगमा दक्ष मात्र होइन, अदक्ष कामदार समेतको अभाव हुन थालेको बताए । ‘ नेपालमै दक्ष जनशक्तिलाई बिदेशको भन्दा राम्रो अवसर हुँदाहुँदै युवा जनशक्ति बाहिरिने क्रम उच्च छ ।’ उनले भने, ‘सरकारले अब कला र सिप भएको जनशक्तिलाई नेपाल मै बस्ने महोल सृजना गर्नुपर्छ ।’
उनले सरकार व्यवसायीप्रति अनुदार बन्दै गएको भन्दै यो वा त्यो बहानामा व्यवसायीलाई दुःख दिएको अध्यक्ष कटुवालको भनाई छ । ‘सरकार हामीप्रति अनुदार भइरहे सबै न्यूरोडका होलसेल व्यवसायीले विकल्प खोज्नुपर्छ’ उनले भने ।
अहिले नेपालको निर्यातमा ठुलो भूमिका निर्वाह गर्दै आएको साना तथा घरेलु उद्योगमा कामदारको चरम अभाव हुन थालेको ब्यवसायीहरु बताउछन् । सरकारले समेत साना उद्योगहरुलाई अघि बढाउन सिपमुलक तामिममा ध्यान दिन नसक्दा नेपालमै रोजगारीको अवसर हुंदाहुंदै पनि लाखौ युवा बिदेश जान बाध्य छन । त्यसो त सरकारले ५ लाख रोजगराी सिर्जना गर्ने दावी गरिरहेका बेला साना तथा घरेलु उद्योगलाई सहुलियत ऋण समेत नदिएको व्यवसायीको गुनासो छ ।
लामिछानेको नेतृत्वमा नयाँ कार्यसमिति चयन
भोटेवहाल तयारी पोशाक उत्पादक तथा बिक्रेता संघको चौथो बार्षिक साधारण सभा तथा तेस्रो अधिवेशनले चन्द्र बहादुर लामिछानेको अध्यक्षतामा नयाँ कार्यसमिति चयन भएको छ । समितिको वरिष्ठ उपाध्यक्षमा शान्ता मणि रेग्मी र महासचिवमा विष्णुप्रसाद गौतमलाई चयन गरिएको निर्बाचन मण्डलका संयोजक हरि बहादुर गौतमले जानकारी दिए । उनका अनुसार उपाध्यक्षमा कुमार बस्नेत, तिलक प्रसाद अधिकारी, कुसुम महर्जन, विकास पोडे, घनश्याम नेपाल, प्रविन्द्र देउला र जाकीर हुसेन अन्सारी चयन भएको छन् ।
यस्तै, संघको सचिवमा द्रोण शेखर खनाल, रामजी उप्रेती, मिलन शर्मा, बिजू बज्राचार्य, लक्ष्मी ठकुरी चयन भएका छन् भने कोषाध्यक्षमा मुना रिजाल सह–कोषाध्यक्षमा शिव केसीलाई चयन गरिएको निर्बाचन मण्डलले जानकारी दिएको छ । संघ कार्यसमितिमा १४ जना सदस्यहरु च्यन गरिएको छ ।
प्रतिक्रिया