कर्णालीका १ सय १ पर्यटकीय गन्तव्यको घोषणा



प्रदेश सरकारको उद्योग, पर्यटन, वन तथा वातावरण मन्त्रालयले कर्णालीका १०१ पर्यटकीय गन्तव्यको घोषणा गरेको छ । स्थानीय तह र सम्बन्धित क्षेत्रका प्रदेश सभा सदस्यको सिफारिसका आधारमा मन्त्रालयले पर्यटकीय गन्तव्य घोषणा गरेको हो ।

मन्त्रालयले प्रदेशका ७९ र संघीय सरकारले घोषणा गरेका १७ गरी १०१ गन्तव्यको पूर्वाधार विकासका साथै प्रवद्र्धनात्मक क्रियाकलापमा जोड दिएको छ । मन्त्री नन्दसिं बुढाले आर्थिक वर्ष ०७६–७७ मा महत्वपूर्ण ३८ गन्तव्य मात्र पूर्वाधार विकासमा बजेट विनियोजन गरेको जानकारी दिए । ‘प्रदेश पर्यटन बोर्डको गठनपश्चात् नयाँ पर्यटकीय गन्तव्यको गुरुयोजना बनाएर बजेट परिचालन गर्नेछौँ,’ मन्त्री बुढाले भने, ‘सीमित बजेटका कारण सबै गन्तव्य क्षेत्रमा बजेट विनियोजन गर्न सकिएन, आगामी वर्षहरूमा क्रमशः बजेट विनियोजन गरिनेछ ।’

मन्त्रालयले चालू आवमा सञ्चालन गरेको हुम्ला, मुुगु र डोल्पाका ज्येष्ठ नागरिक तथा पूर्ण अपांगता भएका व्यक्तिलाई हवाई टिकटमा सहुलियत अनुदान दिने कार्यक्रमलाई पनि निरन्तरता दिएको छ । आव ०७६–७७ मा मन्त्रालयको कुल बजेट रु दुई अर्ब ४५ करोड ६ लाख ७८ हजार रहेको छ ।

प्रतिक्रिया