केपी शर्मा ओलीलाई सके सरकारबाट विस्थापित गर्ने, नसके तह लगाएर छोड्ने योजनाका साथ शुरु भएको प्रचण्डको गुप्त योजना असफल भएको छ । ओलीविरुद्ध नेकपा संसदीय दलमा अविश्वासको प्रस्ताव ल्याउने र अन्ततः पार्टी अध्यक्षबाट समेत हटाउने उद्देश्यका साथ प्रचण्डले केपीविरुद्ध ‘बलियो’ मोर्चा खडा गरेका थिए ।
आफ्नो मोर्चामा वामदेव गौतम, झलनाथ खनाल, नारायणकाजी श्रेष्ठ, सुरेन्द्र पाण्डे र भीम रावलदेखि घनश्याम भुसाल र योगेश भट्टराईसम्मलाई सामेल गरिसकेको बताएर प्रचण्डले माधवकुमार नेपालको विश्वास प्राप्त गर्ने अन्तिम कसरत गरेका थिए । केपीका विरुद्ध सबैजसो नेताहरू एकजुट भइसकेको ‘आकर्षक स्थिति’ देखाएपछि माधव नेपाल पनि प्रचण्ड मोर्चामा सामेल हुन तम्तयार भएको बताइन्छ । केपीलाई पदमुक्त गरेर माधवकुमार नेपाललाई प्रधानमन्त्री बनाइने र आफू पार्टीको ‘एकलौटी अध्यक्ष’ बन्ने सपना पूरा गर्न आवश्यक परे लिखित सम्झौता नै गर्ने योजना प्रचण्डको थियो ।
तर, लुलो नेताका रूपमा चिनिने माधवकुमार नेपाल भने परिस्थितिको ‘जोखना’ हेर्दै थिए । प्रचण्डसँग मिले पनि पद, केपीसँग मिले पनि पद प्राप्त हुने लाभको स्थितिमा माधव नेपाल रहेकोले उनी यतिबेला ‘शक्तिशाली बार्गेनर’को हैसियतमा छन् । प्रचण्डले प्रधानमन्त्री उधारोमा दिइरहेका थिए भने केपी ओली तत्काल माधव नेपाललाई कार्यकारी वा कार्यबाहक अध्यक्ष बनाउन सक्ने अवस्थामा छन् । त्यसैले माधव नेपाल केपीविरुद्धको मोर्चाबन्दीमा सामेल हुनेभन्दा सहमति बनाएर अघि बढ्ने मानसिकतामा पुगेको बुझिएको छ । माधवको यही मानसिकता बुझ्न नसक्दा प्रचण्ड आफ्नो योजनामा तत्काल सफल हुन सकेनन् ।
केपी शर्मा ओली प्रचण्डको इज्जतसम्म राखिदिन तयार देखिन्छन्, प्रचण्डले आफ्नोविरुद्ध यसैगरी चलखेल गरिरहेमा भने केपी जस्तोसुकै जोखिम उठाउन तयार भएको बुझिएको छ । यसरी प्रचण्ड रक्षात्मक अवस्थामा पुगेका त छन्, तर उनी एकपटक असफल हुँदैमा हार मान्ने व्यक्तिमा पर्दैनन् ।
नारायणकाजी श्रेष्ठ र सुरेन्द्र पाण्डे पार्टीमा विग्रह पैदा हुने प्रकारको कुनै कार्य गर्न तत्पर नरहेको र सरकार विस्थापित गर्नेभन्दा पनि सरकारलाई प्रभावकारी बनाउनुपर्छ भन्ने पक्षमा श्रेष्ठ र पाण्डे रहेको बुझिन्छ । त्यस्तै, वामदेव गौतम र योगेश भट्टराई पनि केपीले ‘एक्सेस’ नदिएकोले मात्र प्रचण्डतिर लागेको विश्वास गरिन्छ । यसबीचमा केपीले जब आफ्नो शैलीमा परिवर्तन ल्याए र पार्टीका नेताहरूसँग संवाद र परामर्श शुरु गरे त्यसपछि प्रचण्डको सपना चकनाचुर हुन पुगेको छ ।
प्रचण्ड यतिबेला करिब–करिब एक्लिएका छन् । केपी शर्मा ओली र प्रचण्डबीच पटक–पटक भएका संवादपछि प्रचण्ड आफूले चाल्न खोजेको भावी कदमबारे पुनर्विचार गर्ने स्थितिमा पुगेको बुझिएको छ । माधव र वामदेवदेखि योगेश भट्टराईसम्मले आफूसँगको सहकार्यलाई भन्दा केपीसँगको सहकार्यलाई प्राथमिकता दिएको र, नारायणकाजी श्रेष्ठ र सुरेन्द्र पाण्डे पार्टीमा आन्तरिक विग्रह उत्पन्न हुने प्रकारका कुनै पनि गतिविधि नगर्ने मनस्थितिमा रहेकोले प्रचण्ड एक्लिने अवस्थामा पुगेका हुन् । यसरी एक्लिने अवस्था आएपछि प्रचण्ड अहिले रक्षात्मक भूमिका निर्वाह गर्दै छन् ।
केपी ओलीले आफ्नो ‘फेससेव’मात्र गराइदिने स्थितिको खोजीमा प्रचण्ड रहेका छन् । माधव नेपालको संयोजकत्वमा बनेको दश सदस्यीय समितिले तयार गरेको प्रतिवेदन प्रकाशित गर्ने र तत्काल ‘जनताको बहुदलीय जनवाद’को प्रचारमा पार्टी नेताहरू लागिदिएनन् भने त्यसबाट आफ्नो ‘फेससेभ’ हुन्छ भन्ने प्रचण्डको ठम्याइ छ । केपीले जबजको सट्टा ‘जनताको जनवाद’ स्वीकार गर्नुलाई पनि प्रचण्डले आफ्नो ‘फेससेभ’ गरिदिएको भनेर बुझेका छन् । त्यस्तै, मन्त्रिमण्डल पुनर्गठन गर्दा बुहारी बिना मगरलाई मन्त्रिमण्डलमा यथावत् राखिनुलाई पनि प्रचण्डले आफ्नो ‘नाक’ जोगाइदिएको ठान्ने स्थिति छ ।
प्राप्त जानकारीअनुसार केपी शर्मा ओली प्रचण्डको इज्जतसम्म राखिदिन तयार देखिन्छन्, प्रचण्डले आफ्नोविरुद्ध यसैगरी चलखेल गरिरहेमा भने केपी जस्तोसुकै जोखिम उठाउन तयार भएको बुझिएको छ । यसरी प्रचण्ड रक्षात्मक अवस्थामा पुगेका त छन्, तर उनी एकपटक असफल हुँदैमा हार मान्ने व्यक्तिमा पर्दैनन् । त्यसैले अहिले प्रचण्डलाई एक्ल्याउन र असफल तुल्याउन केपी सफल भए पनि कुनै पनि निहुँमा कुनै पनि दिन प्रचण्डले केपीसँग बदला लिने सम्भावनालाई इन्कार गर्न सकिँदैन ।
प्रतिक्रिया