चालक अनुमतित्रपत्र (लाइसेन्स) छपाईमा कार्यालयकै गल्तीका कारण पुनः छपाइ गर्दासमेत सेवाग्राहीले जरिवाना तिर्नुपर्ने विवशताबाट अब सेवाग्राहीले मुक्ति पाउने भएका छन् । पुनः छपाइ गर्दा दोहोऱ्याएर तिर्नुपर्ने जरिवाना अब हटाउने तयारी गरिएको छ ।

नयाँ चालक अनुमतिपत्र वा नवीकरण गर्दा ‘स्मार्ट’ चालक अनुमतिपत्रमा फोटो वा विवरण स्पष्ट नहुँदा दिइएको प्रतिलिपिका लागि पनि चालक रकम तिर्न बाध्य थिए । यसैगरी सेवाग्राहीको गल्ती नभए पनि विगतमा पुनः छपाइ गर्दा उनीहरुसँग रकम लिने गरिएको थियो ।

यातायात व्यवस्था विभागका प्रवक्ता तीर्थराज खनालका अनुसार चालक आफ्नै कारण प्रतिलिपि लिँदाजस्तै गरेर कार्यालयका कारणले प्रतिलिपि दिँदा दस्तुर लिनुहुँदैन भनेर हटाइएको छ । विभागले छपाइ चाँडो गर्न भन्दै गत वर्ष निजी कम्पनीलाई ‘स्मार्ट’ चालक अनुमतिपत्र छाप्ने जिम्मेवारी दिएको जानकारी पनि उनले दिए ।

उक्त कम्पनीले रङ्गिन छपाइ गर्दा कतिपयमा सेवाग्राहीको फोटो त कतिमा नाम, ठेगाना, रक्त समूहलगायत विवरण स्प्रष्ट बुझिने थिएन । अहिले विभाग आफैँले छापिरहेकाले यी समस्या नरहेको जानकारी दिँदै उनले भने, “हामीले उक्त परिचयपत्र श्यामस्वेत नै छापिरहेकाले नबुझने समस्या छैन ।”

निजी कम्पनीले चालक अनुमतिपत्र छपाइ गर्दा झण्डै १३ हजार कार्डमा समस्या भएको थियो । तीमध्ये कतिपयले प्रतिलिपि लिइसकेका छन् भने कतिपयले लिन बाँकी छ । यातायात कार्यालयले अहिले ‘स्मार्ट’ चालक अनुमतिपत्रका लागि आवेदन दिएका झण्डै नौ लाख ५४ हजार कार्ड छाप्न बाँकी छ । दैनिक झण्डै तीन हजारले चालक अनुमतिपत्रका लागि आवेदन दिइरहेका बताइएको छ ।