मण्डनदेउपुरका सडकमा तीन महिना टिपर र ट्याक्टर सञ्चालनमा रोक





काभ्रेको मण्डनदेउपुर नगरपालिकाले वर्षाको समयमा टिपर र ट्याक्टर सञ्चालन गर्दा निर्माणाधीन सडकमा हुने गरेको क्षतिलाई मध्यनजर गर्दै नगर क्षेत्रभित्रका सडकमा यही असार १ गतेबाट तीन महिनाका लागि त्यस्ता सवारीमाथि रोक लगाउने भएको छ ।

नगरपालिकाको गत २६ गते बसेको बैठकको निर्णयअनुसार शुक्रबार नगरपालिकाले सार्वजनिक सूचना जारी गरी आगामी असार १ गतेबाट भदौ ३० गतेसम्मका लागि सो नगरपालिका भएर सञ्चालनमा रहेको राष्ट्रिय राजमार्गबाहेकका नगर क्षेत्रभित्रका सडकमा टिपर र ट्याक्टर सञ्चालनमा रोक लगाइएको जनाएको हो । त्यसरी गरेको निर्णयलाई बेवास्ता गरी कोही कसैले टिपर र ट्याक्टर सञ्चालन गरेको पाइएमा टिपरलाई प्रतिपटक रु. २५ हजार र ट्याक्टरलाई प्रतिपटक रु. १५ हजार जरिवाना गर्नेसमेत निर्णय गरेको नगरपालिकाले जनाएको छ ।

तर, नगरपालिका क्षेत्रभित्रमा सडक तथा अन्य आयोजनाको निर्माण कार्य एवं निर्माण सामग्री ढुवानी गर्न ती साधनको आवश्यक परेमा भने सम्बन्धित वडाको सिफारिसका आधारमा नगरपालिकाको पूर्वस्वीकृति लिएर मात्रै सञ्चालन गर्न सकिने नगरपालिकाले जनाएको छ ।
नगरपालिका प्रमुख टोकबहादुर वाइबाले वर्षायाममा निर्माणाधीन सडक बिग्रने भएको हुनाले नगर कार्यापालिकाको बैठकले सो निर्णय गरेको बताए ।

नगरपालिकाका प्रवक्ता डिल्ली आचार्यका अनुसार नगरभित्र ठूला सडक १०–१२ जति रहेको र साना शाखा सडक धेरै रहेकामा ती सडक पक्की तथा पक्की नबनाइसकेको हुनाले वर्षायाममा ठूला गाडी (टिपर र ट्याक्टर) चलाउँदा बिगार्ने भएकाले सो निर्णय गरिएको बताए । ‘नगरभित्र अहिले निर्माणाधीन सडक पनि रहेको र अरू सडकमा पनि ठूला टिपर र ट्याक्टर चलाउँदा सडक बिगारेर ठूला खाल्डा हुने र भत्काउने हुँदा यात्रुबाहक बस र अरू साना सवारीसाधन चलाउन गाह्रो हुने भएकाले त्यसलाई मध्यनजर गर्दै हामीले नगर कार्यापालिकाको बैठकले यस्तो निर्णय गरेका हौँ,’ प्रवक्ता आचार्यले भने, ‘त्यसबाहेक सडक निर्माण र अन्य निर्माणका सामग्री ढुवानी गर्नुपरेमा वडा कार्यालयको सिफारिसका आधारमा नगरपालिकाबाट स्वीकृति लिएर मात्रै सञ्चालन गर्न पाउने निर्णय गरेका छौँ ।’

प्रतिक्रिया