मानव अधिकार तथा शान्ति समाजद्वारा प्रत्येक महिनाको अन्तिम बिहीबार आयोजना गरिने शान्ति काव्य प्रवाह शृङ्खलाको ८०औँ कार्यक्रम काठमाडौंमा सम्पन्न भएको छ । शान्ति काव्य प्रवाहमा कविहरु रामबहादुर पहाडी, डा. जीवन अधिकारी, मदन कार्की, रत्ननीधि रेग्मी, मेनुका पोखरेल आचार्य, ऋचा, मञ्जुश्री प्रधान, कल्पना काफ्ले, शर्मिला कार्की, शान्ति रिसाल, दुर्गा वनवासी, सुमी लोहनी, कुशुम शर्मा, उर्मिला पन्त पाण्डेय, पुनम घिमिरे, रुद्र अधिकारी, प्रकाशमणी दाहाल, राजेन्द्रप्रसाद ढुंगाना, जसध्वज गुरुङ, जनार्दन अधिकारी, भुवन शिवाकोटी, बाबुराम लामिछाने, अच्युतप्रसाद पौडेल, गगनदीप सर्व, निर्मल पराजुली, रविन्द्र आशिष शैली, टीएन भट्ट, नमराज घिमिरे, मुकुन्द न्यौपाने, डिल्लीप्रसाद मूलतिहुन, रवीन्द्र ढुङ्गेल, बलराम सापकोटा, ओमप्रसाद कोइराला, कृष्ण पहाडीसहित ३४ जना कविले कविता, मुक्तक, गजल प्रस्तुत गरेका थिए । कार्यक्रममा पशुबली प्रथा अन्त्य गर्न आह्वान गरिएको कवि राजेन्द्र ढुंगानाको कविताले विशेष तारिफ पाएको थियो ।

‘चलायो कसले यो पशुबली प्रथा रोक अब ता’
■ राजेन्द्र ढुंगाना

अहो कस्तो पीडा सहनु कसरी शान्त रहँदै
करायो म्याँ म्याँको करुण स्वरले चोट सहँदै
सुनी चित्कारेको थरथर भए जाउँ म कता
चलायो कसले यो पशुबली प्रथा रोक अब ता

छ डोरी घाँटीमा नयन छ बगेको जिउभरी
खसाली मान्छेको पछि पछि हिँड्यो त्यो भरपरी
दिँदै दानापानी परपर लग्यो घाँस छ जता
चलायो कसले यो पशुबली प्रथा रोक अब ता

जहाँ छन् देवीका चरण प्रभुका मूर्ति थपना
घिसार्यो घिच्चायो बलिदिन गर्यो ध्यान जपना
दयामाया सेवा वरिपरी कतै देख्दिनँ म ता
चलायो कसले यो पशुबली प्रथा रोक अब ता

दियो घाँटी रेटी रगत पशुको भाकल गरी
भयो धर्मात्मारे अबुझ शठ भै दानव सरी
लियो ज्यानै खायो पयर मदिराको मदकता
चलायो कसले यो पशुबली प्रथा रोक अब ता

न देवीले खाइन् लतपत भएको रगतमा
मुछ्यो टीका लायो पशुबली चढायो फगतमा
अहिंसाले मान्छे प्रिय जन हुनेछन् सरलता
चलायो कसले यो पशुबली प्रथा रोक अब ता

कतै बोका राँगा फुल छ कुखुराका सिउरमा
छिनाल्यो छुटयायो अवयव उनेको छ झिरमा
सबै प्राणी बाँचुन् जगत सबको प्रेम समता
चलायो कसले यो पशुबली प्रथा रोक अब ता

गिर्यो मान्छे आफैँ पशु हृदयले हिंस्रक बनी
गर्यो हत्या हिंसा धरपकडले बर्बर बनी
बनौँ मान्छे मान्छे असल नभए मर्छ क्षमता
चलायो कसले यो पशुबली प्रथा रोक अब ता