पार्टीले लिएको ध्वंसात्मक गतिविधि देशको समृद्धि र विकासका लागि बाधक भएको भन्दै नेत्रविक्रम चन्द ‘विप्लव’ नेतृत्वको नेकपाका एक नेताले राजीनामा दिएका छन् ।

सप्तरी जिल्ला ३ नं. एरिया इन्चार्ज छिन्नमस्ता गाउँपालिका–१ का ४० वर्षीय तेजनारायण यादव ‘रञ्जित’ले बिहीबार एक प्रेस विज्ञप्ति जारी गर्दै पार्टीको साधारण सदस्यसमेतबाट राजीनामा दिएको बताएका छन् ।

सरकारले लिएको वार्ता र संवादबाट सबै समस्याको हल हुन्छ भन्ने नीतिअन्तर्गत पार्टी वार्तामा नआउनु देश र जनताका लागि घातक सिद्ध हुने भन्दै प्रेस विज्ञप्तिमा अगाडि भनिएको छ, ‘हतियार सबै समस्याको हल नभएको हुँदा ०७३ सालदेखि नेकपा विप्लवको ३ नं. एरिया इन्चार्जको पदमा कामकाज गर्दै आएकामा आजैको मितिदेखि पार्टीको साधारण सदस्यसमेत नरहने गरी राजीनामा दिई स्वतन्त्र नेपाली नागरिकका रूपमा जीवनयापन गर्न चाहेको छु ।’ अबउप्रान्त उक्त पार्टीसँग आफ्नो कुनै पनि प्रत्यक्ष वा अप्रत्यक्ष सम्बन्ध नरहनेसमेत उनीद्वारा जारी प्रेस विज्ञप्तिमा जनाइएको छ ।

नेकपा विप्लवले लिएको ध्वंसात्मक गतिविधि, आन्तरिक कलह, मधेस एवं मधेसीलाई हेर्ने दृष्टिकोण अस्पष्ट भएका कारण राजीनामा दिनुपरेको उनले बताए ।

रञ्जित तत्कालीन नेकपा माओवादीको जनयुद्धमा समेत संलग्न हुनुहुन्थ्यो । अब उप्रान्त आफू कुनै पनि पार्टीमा आबद्ध नहुने तथा घरपरिवार चलाउन योग्यताअनुसारको पेशामा लाग्नेसमेत उहाँले प्रतिक्रिया दिनुभएको छ ।

ध्वंशात्मक गतिविधि गर्दै जनधनको क्षति गर्न थालेपछि सरकारले ‘विप्लव’ नेतृत्वको नेकपालाई प्रतिबन्ध लगाएको छ । पार्टी प्रतिबन्धपछि सप्तरी प्रहरीले विप्लव समूहका एरिया इञ्चार्ज ‘रञ्जित’ लाई चैत ११ गते पक्राउ गरेको थियो ।