नेपाल सितोरियो कराते संघको वार्षिक कार्यक्रमअनुसार हाइस्कुल केन्द्रीय कमिटीको आयोजनामा २४औँ अन्तर्राष्ट्रिय हाइस्कुल कराते प्रतियोगिता यही जेठ १३ गते सोमबारदेखि शुरु हुने भएको छ । प्रतियोगितामा नेपालसहित भारत, बंगलादेश, पाकिस्तान र भुटानका करिब एक हजार तीन सय खेलाडीको सहभागिता हुने कार्यक्रम संयोजक गजेन्द्रबहादुर खपांगी ईश्वरले जानकारी गराए ।

पुरुषतर्फको जुनियर तथा क्याडेट इभेन्टसमा २०, २३, २५, २७, ३०, ३३, ३५, ४० एकल काता र पुरुषकै सिनियरतर्फ ४५, ५०, ५५, ६० र ६७, ७५, ८४ किलो र एकल काता गरी १८ इभेन्ट्स र महिलातर्फ जुनियर तथा क्याडेट २०, २३, २५,२७, ३०, ३३, ३५, ४० एकल काता र महिलाकै सिनियरतर्फ ४५, ५०, ५५, ६१ र ६७ र ६८ किलो तौल समूहमा हुनेछ ।

त्यस्तै, एकल काता गरी १६ इभेन्ट्स गरी कुल ३४ स्वर्णका निम्ति प्रतिस्पर्धा हुने संयोजक खपांगी ले बताए । विगत २३ वर्षदेखि निरन्तर रूपमा सञ्चालन हुँदै आएको उक्त प्रतियोगितालाई भविष्यका कराते खेलाडीका निम्ति उत्कृष्ट प्लेटफर्मका रूपमा लिने गरिएको छ । दुई दिनसम्म चल्ने उक्त प्रतियोगिताका खेलहरू त्रिपुरेश्वरस्थित राष्ट्रिय खेलकुद परिषदको कभर्डहलमा सञ्चालन हुनेछ ।