व्यापार वार्तामा ‘धैर्य नगुमाउन’ चीनलाई ट्रम्पको आग्रह





अमेरिकी राष्ट्रपति डोनाल्ड ट्रम्पले चीनसँगको व्यापार वार्तामा धैर्य राख्न आग्रह गरेका छन् । अमेरिकाले चिनियाँ उत्पादनमा मूल्य वृद्धि गरेको र चीनले पनि यसको उचित जवाफ दिने बताइरहँदा अमेरिकी राष्ट्रपतिले व्यापार–विवादबारे हतार गर्नु आवश्यक नरहेको धारणा अघिसारेका हुन् ।

अमेरिकाले चीनबाट आयात गर्ने सामानमा २ खर्ब अमेरिकी डलरबराबरको भन्सार करलाई १० प्रतिशतदेखि २५ प्रतिशतसम्म बढाएपछि चीनले शुक्रबार अमेरिकाको सो कारवाहीसम्बन्धी वक्तव्य प्रकाशित गरेको छ । सो वक्तव्यमा अमेरिकाले यस्तो कारवाही गरेकोमा चीनलाई अफसोस लागेको र चीनले बाध्य भएर जवाफी कदम चाल्ने जनाइसकेको एएफपीले जनाएको छ ।

११औं चीन–अमेरिका आर्थिक उच्चस्तरीय वार्ता अमेरिकी वासिङ्टनमा चलिरहेको छ । अमेरिकाले चीनसँगै एउटै दिशातिर अघि बढ्दै साझा प्रयासमार्फत सहयोग तथा छलफलका माध्यमबाट विद्यमान समस्याको समाधान गर्ने आशा चीनले लिएको सो वक्तव्यमा उल्लेख गरिएको छ ।

विश्वका दुई ठूला अर्थतन्त्रबीच एक वर्षदेखि व्यापार वार्ता चलिरहेकोमा बिहीबार रातिदेखि उनीहरूबीच सौदाबाजी चलिरहेको छ ।

अमेरिकामा चलिरहेको वार्तामा चिनियाँ उप–प्रधानमन्त्री लिउ हे, अमेरिकी व्यापार प्रतिनिधि रोबर्ट लाइटहाइजर र अमेरिकी वित्तमन्त्री स्टेभेन मनुचिनले दुईपक्षीय वार्ताको नेतृत्व गरिरहेका छन् ।

‘चीनसँगको वार्ता निकै सौहाद्रपूर्ण ढङ्गबाट अघिबढिरहेको छ । निश्चयपनि हतारमा दगुर्नु आवश्यक छैन । किनकि चीनले अमेरिकालाई कर बुझाइरहेको छ,’ ट्रम्पले शुक्रबार गरेको ट्वीटर सन्देशमा भनेका छन् । तर उनले करबारे व्यापारबार्ताबाट सम्झौता हुनुपर्ने बताएका छन् ।

प्रतिक्रिया