‘फोरम’को नेतृत्व गर्दै आएका उपेन्द्र यादवसँग पार्टी एकता गरेपछि बाबुराम भट्टराईको तत्कालीन नयाँ शक्ति पार्टीमा आवद्ध धेरैले वैकल्पिक गन्तव्यको रूपमा ओली–प्रचण्ड नेतृत्वको नेकपालाई अपनाउन थालेका पाइएको छ । बाबुराम कुन स्वार्थले कुन बेला कोसँग घाँटी जोड्न पुग्छन्, ती सबैसँग जोडिएर हिँड्न नसकिने प्रतिक्रियासमेत कतिपयले दिएका छन् ।

यसरी तत्कालीन नयाँ शक्तिबाट नेकपा प्रवेश गर्ने लहरमा सो पार्टीका केन्द्रिय सदस्य रहेकी सीमा विक पनि थपिएकी छिन् । उनलाई बुधबार नेपाल कम्युनिष्ट पार्टी (नेकपा)का अध्यक्ष प्रचण्डले टीकामाला लगाई पार्टी प्रवेश गराएका छन् ।

कुनैबेला जनमुक्ति पार्टी नामक दलकी नेतृ रहेकी सीमा सो पार्टीबाट दोस्रो संविधानसभामा सदस्य (सभासद) समेतर रहेकी थिइन् । बाबुरामले माओवादी छोडेर नयाँ शक्ति गठन गरेपछि उनी केन्द्रिय सदस्यको रूपमा क्रियाशील रहँदै आएकी थिइन् ।

बुधबार पार्टी मुख्यालय धुम्बाहारीमा सीमा बिकलगायतलाई पार्टी प्रवेश गराउँदै प्रचण्डले बाँकी रहेका पार्टी एकताको काम अन्तिम चरणमा पुगेको दाबी गरे । पोलिटब्यूरो, जनवर्गीय सङ्गठनको एकता र केन्द्रीय सदस्यको कार्यविभाजनको काम केही दिनमा टुङ्ग्याएर सार्वजनिक गरिने उनले बताए ।

एउटै कम्युनिष्ट पार्टी बनाएर मुलुकलाई समृद्धितर्फ लैजान पार्टी लागिपरेको दाबी गर्दै उनले नेकपामा प्रवेश गर्नेको लहर देशव्यापी रूपमा बढेको बताए । उनले भने– ‘नेकपामा जोडिनका लागि थुप्रैसँग सम्पर्क भइरहेको छ । हामी पनि यही पार्टीमा जोडिन चाहन्छौँ भनेर देशभरबाट खबर आइरहेका छन्, केही दिनमा ठूला, साना कम्युनिष्ट पार्टी नेकपामा जोडिन आउनेछन् । पार्टीलाई अझ पूर्णता बनाउने नै हो ।’