इस्लामिक स्टेट आईएस विद्रोही समूहले उसको नाइके अबु बकर अल बग्दादी बोलेको भिडिओ सार्वजनिक गरेको छ । भिडियोमा श्रीलङ्कामा भएको शृङ्खलाबद्ध विस्फोटनको जिम्मा लिइएको छ । यसका साथै अझ लामो सङ्घर्ष जारी रहेको समेत जनाएको छ ।
भिडिओ सन्देशको सत्यताबारे जाँच
बीबीसीका अनुसार सिरिया र इराकमा उक्त समूहले आफ्नो नियन्त्रणमा रहेको भूभाग गुमाए पनि आईएस विरुद्धको लडाइँ नसिकिएको प्रस्ट भएको अमेरिकी विदेश मन्त्रालयले बताएको छ । सो भिडिओमा अल बग्दादी भनि चिनाइएको व्यक्तिले सिरियामा मारिएकाहरूको बदलास्वरूप आफूहरूले आठ देशमा दर्जनौँ आक्रमण गरेको बताएका छन् । पाँच वर्षपछि पहिलो पटक भिडियो सार्वजनिक भएपछि अमेरिकाले सो समूहलाई निमिट्यान्न पारिदिने प्रतिबद्धता दोहोर्याएको छ । यता, अमेरिकी अधिकारीहरूले भिडिओ सन्देशको सत्यताबारे जाँच भइरहेको जनाएका छन् ।
शंका उपशंका भने कायमै
यस अघि सन् २०१४ मा इराकी सहर मोसुलमा क्यालिफेट घोषणा गर्ने क्रममा बग्दादी देखिएका थिए । बीबीसीका सुरक्षा संवाददाता फ्र्याङ्क गार्डनरलाई के भिडिओमा देखिएका व्यक्ति अल बग्दादी नै हुन् भनेर सोध्दा उनको जबाफ थियो, ‘ती व्यक्ति बग्दादी होइन रहेछन् भने मलाई अचम्म लाग्नेछ । यदि झुटो हो भने ती दुरुस्त बग्दादीजस्तै देखिने व्यक्ति हुनुपर्छ । जे होस् भिडिओमा बग्दादी नै जस्तो देखिन्छ र सुनिन्छ ।’
आईएसका समर्थकहरूलाई प्रोत्साहन मिल्न सक्ने डर
यसअघि रुस र इराकले हवाई आक्रमणमा अल बग्दादी सम्भवतः मारिइसकेको भनेका थिए । अमेरिकाले चाहिँ सन् २०१७ मा भएको एक आक्रमणमा उनी गम्भीर घाइते भएको र उनलाई महिनौँसम्म युद्धभूमिबाट पर लगिएको बताएको थियो । तर भिडिओमा स्वस्थजस्तो देखिने बगदादीलाई देखेपछि त्यसले आईएसका समर्थकहरूलाई प्रोत्साहन मिल्न सक्ने डर रहेको गार्डनरले बताएका छन् ।
प्रतिक्रिया