नेपाली कांग्रेसका सभापति तथा पूर्वप्रधानमन्त्री शेरबहादुर देउवाले केपी ओली नेतृत्वको वर्तमान सरकारले राम्रो काम गर्न नसकेको बताएका छन् ।
उनले पत्रकार र शिक्षकलगायत सबैमाथि अन्याय, अत्याचार गर्ने ओली नेतृत्वको सरकारबाट जनतालाई मुक्ति दिने गरी आन्दोलनको तयारीमा लाग्न पार्टीमा आबद्ध नेपाल विद्यार्थी संघलाई निर्देशन दिएका छन् ।
शुक्रबार राजधानीमा नेपाल विद्यार्थी संघको ४९औँ स्थापना दिवसको अवसर आयोजित कार्यक्रममा बोल्दै उनले सो कुरा बताएका हुन् । सो अवसरमा देउवाले बालिका निर्मला पन्तको हत्यारालाई कारबाही गर्नुको सट्टा बचाउ गर्ने, दैनिक उपभोग्य वस्तुको मूल्य बढाउने, जनतालाई करमाथि कर थोपर्नेजस्ता जनताविरोधी काम ओली सरकारले गरिरहेकोले त्यसको भण्डाफोर गर्न निर्देशन दिए ।
नेविसंघको नेतृत्वको चयनमा कसैप्रति अन्याय नगर्ने भन्दै उनले विघटित नेपाल विद्यार्थी संघको पुनर्गठन चाँडै गरिने आश्वासन पनि दिए । नेतृत्वका लागि ३२ वर्षे उमेर हद लागू गर्ने–नगर्ने निर्णय नेविसंघकै नेताहरूको परामर्शको आधारमा लिइने उनको भनाइ छ ।
प्रतिक्रिया