ऋण तिर्न नसकेर जेल परेका चर्चित बलिउड अभिनेता तथा हास्य कलाकार राजपाल यादव हालै रिहा भएका छन् । जेलबाट रिहा भएपछि निकै उत्साहित देखिएका यादवले आफ्नो इमानदारी र विश्वासको केही व्यक्तिले दुरुपयोग गरिदिँदा आफूले जेलको सास्ती भोग्नुपरेको खुलासा गरे ।

जेल परेपछि राजपाल बिरामी परेको र उनकोे मृत्यु भएको भन्नेसम्मको हल्ला बलिउडमा चलेको थियो ।

उक्त हल्लाबारे यादवले भने– ‘यो मेरो करिअर सिध्याउन केही व्यक्तिले फैलाएको अफवाह मात्र थियो, हेर्नुहोस् म त सकुशल छु, केही समयपछि फिल्म खेल्नेछु ।’

यादवले थपे– ‘सबैको जिन्दगीमा उतारचढाव आउँछ, मेरो पनि आयो, तर मैले हिम्मत हारेको छैन, म अगाडि बढ्न चाहन्छु ।’

त्यस्तै, देशको कानुन सबैको लागि समान हो, कानुनबाट कोही बच्न सक्तैन भन्दै आफुले अदालतको आदेश निकै अनुशासनका साथ पालना गरेको उनले बताए । जेलमा निकै कडा अनुशासन थियो त्यो सबैले पालना गर्नुपर्थ्यो, मैले पनि गरेँ ।

ज्ञात होस्, सन् २०१८ मा राजपालले एक कम्पनीसँग पाँच करोड ऋण लिएका थिए । फिल्म निर्माणका लागि उनले सो ऋण लिएका थिए । तर, उक्त ऋण समयमा चुक्ता नगरेका कारण दिल्ली हाईकोर्टले यादवलाई जेल सजाय सुनाएको थियो ।