प्रधानमन्त्री केपी शर्मा ओलीले मुलुुकमा आतङ्क मच्चाएर हिँड्ने विप्लवलाई जेल हालेर भए पनि मूलधारमा ल्याएरै छाड्ने बताएका छन् । उनले चैत्रभित्रै विप्लव नेतृत्वको नेकपालाई वार्तामा आउन आग्रह समेत गरे । यदि वार्तामा नआएमा पूरै नियन्त्रण गर्ने र सरकार झन कठोर रुपमा प्रस्तुत हुने प्रधानमन्त्रीले चेतावनी दिदै आएका छन् ।

प्रधानमन्त्री ओलीले यस्तो चेतावनी दिइरहँदा सरकारले चैत महिनाभित्र आफूहरुमाथि लगाएको प्रतिबन्ध हटाउन अल्टिमेटम समेत दिएको छ । सरकार यसमा लचक नभए सरकारका सबै कार्यक्रममाथि प्रतिबन्ध लगाउने चेतावनी नेत्रविक्रम चन्द ‘विप्लव’ नेतृत्वको नेकपाले दिएको छ ।

पार्टीका महासचिव नेत्रविक्रम चन्द विप्लवले एक विज्ञप्ति जारी गर्दै चरणबद्ध आन्दोलनको घोेषणा गरेको जनाएका छन् । पार्टीका मध्य क्षेत्र कमाण्डर हेमन्त प्रकाश ओलीसहितका आफ्ना नेता तथा कार्यकर्ता पक्राउ गरेको भन्दै विप्लव समूह सरकारविरुद्ध आक्रामक बन्न खोजेको बुझिएको छ । उनीहरुको रिहाइ र पार्टीमाथिको प्रतिबन्ध यही चैत्रभित्रै नहटाए चरणबद्ध अन्दोलन गर्ने घोषणा गरेको छ ।

विज्ञप्तिमा उल्लेख भएअनुसार बुधबार मुलुकभरका चोक–चोकमा जुलुस निकाल्ने, बिहीबार कोणसभा गर्ने, शुक्रबार मसाल जुलस निकाल्ने र शनिबार पूरै नेपाल बन्द गर्ने कार्यक्रम तय गरिएको छ ।

यस्तै, चैत १९ गते देशभर अन्तरक्रिया कार्यक्रम गर्ने, २१ गते जनवर्गीय संगठनको विरोध प्रदर्शन गर्ने र २३ गते कालो झण्डा प्रदर्शन गर्ने तथा २४ गते मुलुकभरि जनप्रदर्शन गर्ने विज्ञप्तिमा उल्लेख छ ।

यता, सरकारले पनि विप्लवमाथि प्रतिबन्ध गरेर त्यस समूहका नेता तथा कार्यकर्ता जहाँ भेट्यो त्यही पक्राउ गर्न र गोली समेत हान्न आदेश दिएको छ । केही दिनअघि विप्लवका मध्य कमाण्ड हेमन्तप्रकाश ओलीसहित नौँ जनालाई काभ्रेबाट पक्राउ भइसकेका छन् ।