कर्णाली प्रदेशमा एसईईको तयारी पूरा, ३६ हजार विद्यार्थीले परीक्षा दिँदै





पर्सि चैत १० गतेदेखि सञ्चालन हुने माध्यमिक शिक्षा परीक्षा (एसईई)मा कर्णाली प्रदेशबाट ३६ हजार ५ सय २४ विद्यार्थी सहभागी हुने भएका छन् ।

नियमिततर्फ ३४ हजार २५, एक्ज्याम्टेडतर्फ एक हजार ८ सय ३८, प्राविधिकतर्फ ६ सय ४५, अपांगता भएका १३ र कैदी तीन विद्यार्थी परीक्षामा सहभागी हुने शिक्षा विकास निर्देशनालय कर्णाली प्रदेश सुर्खेतका निर्देशक भक्तबहादुर ढकालले जानकारी दिए । ‘दश जिल्लामा १६९ केन्द्र छन्,’ निर्देशक ढकालले भने, ‘परीक्षा सञ्चालनका लागि केन्द्राध्यक्ष, सहायक केन्द्राध्यक्ष, निरीक्षक, परीक्षा सहायक र कार्यालय सहयोगी गरी दुई हजार ९ सय ७८ जनशक्ति परिचालन गरिनेछ ।’

त्यसैगरी, प्रत्येक केन्द्रमा १५ जना पुग्ने गरी १६९ परीक्षा केन्द्रमा दुई हजार ७० सुरक्षाकर्मीको व्यवस्था गरिएको उनले बताए । ढकालका अनुसार साबिकका कर्णालीका जिल्लामा देखिएको सुरक्षा चुनौतीलाई ध्यानमा राखेर सम्बन्धित जिल्लाका प्रजिअ तथा जिल्ला परीक्षा समन्वय समितिका अध्यक्षले सुरक्षाकर्मीको व्यवस्था गर्नेछन् ।

शिक्षा विकास निर्देशनालय कर्णाली प्रदेश सुर्खेतका उपसचिव विष्णुप्रसाद गोतामेले एसईई परीक्षा तयारी र व्यवस्थापनका लागि पहिलोपटक कर्णाली प्रदेश सरकारले समन्वयको भूमिका निर्वाह गर्न थालेको बताए । ‘हामीले यो परीक्षाका लागि चार लाख १३ हजार २७१ उत्तरपुस्तिका आफैँले छापेका छौँ,’ उपसचिव गोतामेले भने, ‘प्रदेशबाट परीक्षाको व्यवस्थापन भए पनि राष्ट्रिय परीक्षा बोर्ड, परीक्षा नियन्त्रण कार्यालय सानोठिमी भक्तपुरबाट दुई लाख ८९ हजार २८९ प्रश्नपत्र यहाँ पठाइएको र प्रश्नपत्र १० वटै जिल्लामा पुगिसकेका छन् ।’

प्रदेश सरकार, सामाजिक विकास मन्त्रालयले साउनमा हुने एसईई ग्रेडवृद्धि परीक्षासमेतका लागि भनेर रु. दुई करोड ८६ लाख पाँच हजार बजेट विनियोजन गरेको उनको भनाइ छ । चैत १० देखि २१ गतेसम्म हुने परीक्षाका लागि सबै तयारी पूरा भएको एसईई परीक्षा २०७५, तयारी तथा व्यवस्थापन समन्वय समिति कर्णाली प्रदेश सुर्खेतले जनाएको छ ।

प्रतिक्रिया