अमेरिका प्रस्थान गर्नुअघि प्रचण्डले गरे यस्तो खुलासा

श्रीमती सीताको उपचारका लागि आइतबार अमेरिका प्रस्थान गरेका नेकपा अध्यक्ष पुष्पकमल दाहालले अमेरिका यात्राको लागि अमेरिकी दूतावासले सहजीकरण गरिदिएको खुलासा गरेका छन् । प्रस्थानका निम्ति त्रिभुवन अन्तर्राष्ट्रिय विमानस्थल पुगेपछि सञ्चारकर्मीहरुसँग कुराकानी गर्दै प्रचण्डले परराष्ट्र मन्त्रालय, अमेरिकी दूतावास र अमेरिकास्थित नेपाली दूतावासले सहजीकरण गरेको जानकारी दिएका हुन् ।

प्रधानमन्त्री केपी शर्मा ओली र पार्टीमा सल्लाह गरेर नै आफू त्यसतर्फ जान लागेको पनि उनले प्रष्ट्याए ।

बढीमा सातदेखि दश दिनभित्र स्वदेश फर्कने उल्लेख गर्दै प्रचण्डले मुख्यतः आफू पत्नी सीताको स्वास्थ्य उपचारका लागि गए पनि त्यहाँ रहँदा राजनीतिक भेटघाटको सम्भावना रहेको स्वीकार गरे । परराष्ट्र मन्त्रालयले अमेरिकी सरकारका अधिकारीसँग औपचारिक वा अनौपचारिक छलफल हुने सम्भावना बढेको आफूलाई जानकारी गराएको उनको भनाई थियो ।

देशमा कुनै खालको अन्योल र अस्थिता पैदा गर्ने तत्वका विरुद्ध नेपाली एक भएर उभिनुपर्ने तर्क पनि उनले सो क्रममा गरे । सबै राजनीतिक दल, सरकार, नागरिक समाज, बुद्धिजीवी मिलेर संविधान बनायौँ, निर्वाचन गरायौँ, अब सबै मिलेर विकास र समृद्धिलाई पनि अगाडि बढाउनुपर्छ भन्दै प्रचण्डले गएको वर्ष सरकार र पार्टीले पूर्वाधार बनाएको र अगागामी वर्ष विकास निर्माणले गति लिने दाबी गरे ।

pic: rss

प्रतिक्रिया