लनटेनिस खेलाडी प्रणव शिखरको ब्रान्ड एम्बासडर

3 Shares

शिखर इन्सुरेन्स कम्पनी लिमिटेड, थापाथलीले लनटेनिस खेलाडी प्रणव खनाललाई ब्रान्ड एम्बासडरमा नियुक्त गरेको छ । पुरुष सिंगल्स वरीयताको दोस्रो स्थानमा रहेका प्रणव र शिखर इन्सुरेन्सका प्रमुख कार्यकारी अधिकृत दीपप्रकाश पाण्डेले सोसम्बन्धी सम्झौतापत्रमा हस्ताक्षर गरे ।

चैत १ देखि लागू हुने सम्झौताअनुसार प्रणवलाई शिखरले एक वर्षका लागि पाँच लाख रुपैयाँ उपलब्ध गराउनेछ । त्यसमा प्रणवलाई ब्रान्ड एम्बासडरबापत मासिक नगद प्रदान गर्नुका साथै प्रशिक्षणका लागि आवश्यक सामग्री खरिद गर्न रकम पनि उपलब्ध गराउनेछ ।

आठ वर्षको उमेरदेखि लनटेनिस खेल्न सुरु गरेका प्रणवले इन्डोनेसियामा भएको १८औँ एसियाली खेलकुदसहित एक दर्जन अन्तर्राष्ट्रिय प्रतियोगितामा सहभागिता जनाइसकेका छन् । २०११ मा भियतनाम भएको प्रतियोगिता प्रणवको ‘डेब्यु’ अन्तर्राष्ट्रिय प्रतियोगिता थियो । त्यतिखेर उनी ११ वर्षका थिए । १७ वर्षीय प्रणवले हालसम्म चार अन्तर्राष्ट्रिय पदक जितेका छन् । उनले कतारमा २०१४ र २०१५ मा भएको कतार एसियन यू–१४ जुनियर टिम कपमा कांस्य, २०१८ मा भारतमा भएको खुला आईटीएफ जुनियर टेनिसको डबल्समा कांस्य तथा २०१८ मै भारतमै भएको तेन्जिङ नोर्गे स्मृति खुला टेनिसमा स्वर्ण जितेका थिए ।

सिंगल्समा १०औँ सहवीर स्मृति खुला लनटेनिसमा स्वर्ण, सहवीर स्मृतिकै ८औँ संस्करणमा रजत, प्रथम बुटवल खुला लनटेनिसमा स्वर्ण तथा पाँचौँ सिटिजन्स बैंक खुला लनटेनिस र सातौँ राष्ट्रिय खेलकुदमा जितेको कांस्य घरेलु प्रतियोगितामा प्रणवले हासिल गरेको मुख्य उपलब्धि हुन् ।

प्रणवले प्रायोजनले आफ्नो खेलमा अझ सुधार ल्याउन मद्दत पुग्ने बताउँदै प्रायोजनका लागि शिखरप्रति आभार व्यक्त गर्दै धन्यवाद दिए । उनले टेनिसमा धेरै कम खेलाडीले मात्र प्रायोजक पाइरहेको अवस्थाको अन्त्य गर्न आफ्नो खेलमा सुधार गर्दै अन्य संस्थालाई पनि प्रायोजनका लागि आकर्षित गर्न हरसम्भव प्रयास गर्ने प्रतिबद्धता व्यक्त गरे ।

प्रमुख कार्यकारी पाण्डेले टेनिस खेलाडीलाई पनि कर्पोरेट क्षेत्रबाट प्रोत्साहन मिलोस् भन्ने उद्देश्यले सानो सुरुवातका रूपमा प्रायोजन गरेको बताउँदै शिखरको तर्फबाट चाँडै नै टेनिस प्रतियोगिता आयोजना गर्ने तयारी भइरहेको जानकारी गराए । नेपाल टेनिस संघकी अध्यक्ष ज्योति राणाले प्रणवको खेलको कदर गर्दै प्रायोजन गरेकोमा खुसी व्यक्त गर्दै शिखरलाई धन्यवाद दिइन् ।

3 Shares

प्रतिक्रिया