नेपाल कम्युनिस्ट पार्टी (नेकपा)ले पार्टीको सांगठानिक एकताका लागि गठित कार्यदल भंग गरेको छ । प्रधानमन्त्रीनिवास बालुवाटारमा शुक्रबार बसेको सचिवालय बैठकले कार्यदलको म्याद थप नगर्ने निर्णय गरेपछि कार्यदल भंग भएको हो । अब शीर्ष नेताहरू रहेको सचिवालयले नै पार्टी सांगठनिक एकताको प्रस्ताव तयार पारेर स्थायी कमिटीमा पेस भएको छ ।
बिहीबार बसेको सचिवालय बैठकमा कार्यदल संयोजक रामबहादुर थापा बादलले पेस गरेको कार्यदलको प्रतिवेदनमा एक साताका लागि समय माग गरिएको थियो । बैठकमा बोल्ने कार्यदलका बहुमत सदस्यले पनि म्याद थप्नुपर्ने राय व्यक्त गरेका थिए ।
तर, प्रधानमन्त्री एवं पार्टी अध्यक्ष केपी शर्मा ओलीले कार्यदल विघटन गर्ने प्रस्ताव गरेपछि हिजोको बैठक आजसम्मका लागि स्थगित भएको थियो । शुक्रबारको सचिवालय बैठकले ओलीकै प्रस्तावअनुसार निर्णय गरेकोले कार्यदल भंग भएको हो । कार्यदल भंग भएसँगै नेकपाभित्र मदभेद चुलिएर गएको छ ।
पार्टी प्रवक्ता नारायणकाजी श्रेष्ठले एकताका लागि बनेको कार्यदल भंग भएको जानकारी दिए । उनले भने, ‘अहिलेसम्मको कामका लागि कार्यदललाई धन्यवाद । अब सचिवालयले प्रस्ताव तयार गर्नेछ र स्थायी समितिमा पेस गर्नेछ ।’
तत्कालीन नेकपा (एमाले) र नेपाल कम्युनिस्ट पार्टी (माओवादी) एक भएर नेकपा बनेर चुनाव लडेपछि पार्टीको सांगठानिक एकताका लागि रामबहादुर थापा बादलको संयोजकत्वमा कार्यदल बनेको थियो ।
प्रतिक्रिया