पाँच अर्बभन्दा बढीको लगानीका साथ पर्यटकीय क्षेत्र ठमेलमा हालै सञ्चालनमा आएको ‘छाया सेन्टर’ विवादमा तानिएको छ । स्थानीयवासी केहीको विरोधका कारण उक्त व्यापारिक सेन्टर विवादमा तानिएको हो ।

सो व्यावसायिक भवनमा करिव ३० व्यवसायीको पाँच अर्बभन्दा बढी लगानी रहेको बताइन्छ । उक्त भवनलाई स्थानीयवासीले सुनियोजित तवरबाट आक्रमणको निशाना बनाएको सेन्टरका सञ्चालकको आरोप छ ।

ठमेलभित्रको ठूलो परियोजना सरकारी निकायले पूरा गर्नुपर्ने भन्दै सबै प्रक्रिया सकेर निर्माण गरिएको छाया सेन्टरलाई स्थानीयवासीले अनर्गल प्रचार गरी आक्रमणको निशाना बनाएको सेन्टरका प्रबन्ध निर्देशक महेश्वर श्रेष्ठले आरोप लगाएका छन् ।

पर्यटकीय व्यावसायिक गन्तव्यका रुपमा छाया सेन्टर सञ्चालनमा ल्याइएको थियो । सो कम्प्लेक्समा तारे स्तरको होटलसहित तीन मल्टिप्लेक्स थिएटर छन् भने विभिन्न सामग्रीका पसल, एयरलाइन्सका शाखा कार्यालय, ट्राभल एजेन्सी, ब्याङ्क्वेट हल, सेमिनार हल, रिसेप्सन हल, रेस्टुरेन्ट, क्लब लगायतका सुविधा पनि त्यहाँ उपलब्ध छ । यस्तै, विभिन्न बैंकका कर्पोरेट शाखा कम्पनीका कर्पोरेट कार्यालय छाया सेन्टरमा खुल्न थालेका छन् ।

सरकारले वैदेशिक लगानी भित्र्याउन आगामी चैत १५ र १६ गते काठमाडौंमा नेपाल लगानी सम्मेलन गर्ने तयारी गरिरहेको सन्दर्भमा यस्ता व्यावसायिक लगानीलाई निरुत्साहित गरिनु गम्भीर विषय भएको सम्बद्ध व्यवसायीको भनाइ छ । ठमेलभित्रको ठमेलका रुपमा आएको योजनामा केही व्यक्तिको स्वार्थले अहिले गलत प्रचारलाई गरिएको र पैसा तिरी जग्गा किनेर पनि योजना अघि बढाउन नदिने षडयन्त्र भएको प्रबन्ध निर्देशक श्रेष्ठले बताए।

ज्ञातव्य छ, काठमाडौ. महानगरपालिकाले २०६९ साल असोज ११ गते छायादेवी कम्प्लेक्सको डिपिसीसम्मको नक्सा पास गरेको थियो । सोही वर्ष असोज ३१ गते महानगरपालिकाले कम्प्लेक्सलाई स्थायी नक्सापास गरिदिएको थियो । गत कात्तिक ८ गते कामनपाले छायादेवी कम्प्लेक्सलाई भवन निर्माण सम्पन्नको प्रमाणपत्र उपलब्ध गराएको थियो ।