दिदीबहिनी महोत्सवमा ‘राष्ट्रिय भलिबल’ हुँदै





बृहत् एघारौँ गण्डकी प्रदेशस्तरीय महिला महोत्सव तथा रेडियो दिदीबहिनीको नवौँ वार्षिकोत्सवका अवसरमा सञ्चालन हुने दिदीबहिनी कप राष्ट्रिय महिला भलिबल माघ अन्तिम सातादेखि सञ्चालन हुने भएको छ । आयोजक रेडियो दिदीबहिनी ९५.२ मेगाहर्जकी अध्यक्ष कल्पना चापागाईंले उक्त कुराको जानकारी गराएकी हुन् । पर्वतको सदरमुकाम कुश्मा बजारमा माघ २५ देखि फागुन ५ सम्म सञ्चालन हुने बृहत् एघारौँ गण्डकी प्रदेशस्तरीय महिला महोत्सवका दौरान माघ २८ देखि फागुन १ सम्म राष्ट्रिय महिला भलिबल प्रतियोगिता तीन दिनसम्म चल्नेछ ।

कम्तीमा ६ टोलीबीच हुने प्रतियोगिताको विजेताले २ लाख, दोस्रो टोलीले १ लाख र तेस्रो हुने टोलीले ५० हजार रुपैयाँ प्राप्त गर्नेछन् । त्यस्तै, उत्कृष्ट खेलाडीले १० हजार, विधागत ६ उत्कृष्टले जनही ५ हजार प्राप्त गर्नेछन् । प्रतियोगितामा तीन विभागीय टोली त्रिभुवन आर्मी क्लब, नेपाल प्रहरी क्लब, नेपाल एपीएफ क्लबसहित न्यु डायमन्ड एकेडेमी, पश्चिमाञ्चलको टिम, आयोजक दिदीबहिनी क्लबको सहभागिता रहने लगभग निश्चित भएको अध्यक्ष चापागाईंले बताएकी छिन् । खेलको माध्यम र प्रतिस्पर्धामार्फत राष्ट्रको गौरव बढाउने, कला र संस्कृतिको संरक्षण र घरेलु वस्तुको प्रवद्र्धन गर्दै महिलाको क्षमता अभिवृद्धि तथा समानताको आवाज बुलन्दित गर्न चेतना अभिवृद्धि गर्ने महोत्सवको उद्देश्य रहेको अध्यक्ष चापागाईंको भनाइ छ ।

महोत्सवका दौरान सञ्चालन गरिने खुला दौड प्रतियोगिताको विजेताले २५ हजार, दोस्रो हुनेले १५ र तेस्रो हुने खेलाडीले १० हजार रुपैयाँ प्राप्त गर्नेछन् । दौडमा महिला–पुरुषले एकैपटक दौडने छन् । भलिबल प्रतियोगिताको उद्घाटन माघ २८ गते दौड आयोजना गर्ने योजना रहेको छ । यस वर्ष महिला भलिबल, दौडसहित प्रथम दिदीबहिनी डान्स आइडल, रत्यौली प्रतियोगिता, भजन प्रतियोगिता, उत्कृष्ट ¥याली तथा झाँकी प्रदर्शन महोत्सवका आकर्षक हुन् ।

पर्वतका सातवटै पालिकामा निःशुल्क स्वास्थ्य शिविर, विभिन्न राष्ट्रियस्तरका लोकगायकगायिकाको साङ्गीतिक प्रस्तुति, हास्यव्यङ्ग्य प्रस्तुति, जनचेतनामूलक कार्यक्रम प्रस्तुति र ज्येष्ठ नागरिक, अनाथ बालबालिका, एकल महिला, अपाङ्गता भएका व्यक्तिहरूलाई सम्मान गर्ने कार्यक्रम रहेको छ । पत्रकार सम्मेलनमा नेपाल भलिबल सङ्घका अध्यक्ष मनोरञ्जनरमण शर्मा, महासचिव जितेन्द्रबहादुर चन्दलगायतको उपस्थिति रहेको थियो ।

प्रतिक्रिया