कर्णालीबाट श्रम स्वीकृति सेवा, काठमाडौँ आउनुपर्ने बाध्यताबाट मुक्त

कर्णालीबाट श्रम स्वीकृति सेवा, काठमाडौँ आउनुपर्ने बाध्यताबाट मुक्त


कर्णाली प्रदेशको राजधानी वीरेन्द्रनगरस्थित श्रम तथा रोजगार कार्यालयले वैदेशिक रोजगारीसम्बन्धी सेवा शुरु गरेको छ । सामाजिक विकासमन्त्री दल रावलले आइतबार वैदेशिक रोजगारीमा जान लागेका पहिलो सेवाग्राहीलाई पुनः श्रम स्वीकृति प्रदान गरेका हुन् ।

मन्त्री रावलले साउदी अरब जाने तयारीमा रहेका सुर्खेतका ललित घर्तीलाई पुनः स्वीकृतिका लागि स्टिकर टाँसिएको राहदानी प्रदान गरे । वैदेशिक रोजगारीका सिलसिलामा घर्ती १७ वर्षदेखि साउदी अरबमा छन् । बिदामा आउनुभएका उहाँले घर नजीकबाटै पुनः श्रम स्वीकृति पाउँदा खुशी लागेको प्रतिक्रिया दिए ।

प्रदेशस्तरबाटै वैदेशिक रोजगारीसँग सम्बन्धित सेवालाई प्रवाह गर्ने उद्देश्यले सरकारले पुनः स्वीकृति सेवा प्रदान गर्ने थालेको हो । श्रम कार्यालय सुर्खेतका प्रमुख श्यामकृष्ण आचार्यले पुनः श्रम स्वीकृति प्रदान गर्नाका साथै वैदेशिक रोजगारीसम्बन्धी इजाजत पाएका संस्था र तालीम प्रदायक संस्थाको अनुगमन तथा नियमन गर्ने काम पनि शुरु भएको जानकारी दिए ।

सामाजिक विकासमन्त्री रावलले वैदेशिक रोजगारीमा जाने कामदारको सहजताका लागि प्रदेशबाटै पुनः श्रम स्वीकति प्रदान गरिनु सङ्घीयताको उपलब्धि भएको बताए । ‘अहिलेसम्म श्रम स्वीकृति लिने व्यवस्था एकै ठाउँबाट मात्र हुँदा सेवाग्राहीले निकै सास्ती भोग्नुपरेको थियो,’ उनले भने, ‘श्रम स्वीकृतिकै लागि कर्णालीवासीले काठमाडौँ धाउनुपर्ने अवस्थाको अन्त्य भयो ।’ सेवाग्राहीले अब काठमाडौँको श्रम कार्यालयमा लाइन लाग्नुपर्ने बाध्यता हटेको छ ।