भारतको वराणसीमा यही जनवरी २१ देखि २३ तारिखसम्म हुन गइरहेको १५औँ प्रवासी दिवसको दिन नेपालको संघीयय संसदका सदस्य चन्दा चौधरीलार्ई ‘She the Change- Nari Udyami Awards 2019’ बाट सम्मानित गरिन लागिएको बुझिएको छ । सांसद चौधरी राष्ट्रिय जनता पार्टी नेपाल को तर्फबाट संघीय सांसद एवम् नेपाल भारत महिलामैत्री समाजको संस्थापक अध्यक्ष पनि हुन् । तीन दिवसीय उक्त कार्यक्रम मा विश्वभरीबाट हजारौको संख्यामा महिलाहरुको सहभागिता हुने भएको छ ।

भारतको उत्तर प्रदेशका मुख्यमन्त्री योगी आदित्यनाथ, युनियन मिनिस्टर अफ टेक्सटाइल श्रीमती स्मृति जुबिन इरानीलगायत उच्च तहका नेता एवं ब्यक्तिहरुले कार्यक्रमको उद्घाटन गर्नेछन् ।

यसैगरी सम्मान कार्यक्रमको सहजिकरण बि एण्ड एस फाउण्डेशनले गर्नेछ भने यो सम्मान गान्धी स्मृति, दर्शन समिति र संस्कृति मन्त्रालयको तर्फबाट सामुहिक रुपमा प्रदान गर्नेछ ।

त्यसैगरि आ–आफ्नो क्षेत्रमा दखलता हासिल गरेका विद्वतवर्गहरुको समेत सहभागतिा हुने बताइएको छ । समारोहमा विभिन्न विषयहरु जस्तै, वर्तमान समयमा गान्धीको सान्दर्भिकता, कुम्भ स्नानको सान्दर्भिकता, शिक्षा एवं सिपको आवश्यकता जस्ता विषयहरुमा छलफल समेत गरिने छ ।

नेपाल भारत महिला मैत्री समाजको तर्फबाट सांसद चौधरीले ग्रामीण क्षेत्रका महिलाहरुमा जनचेतना जगाउने, सिमांतकृत महिलाहरुलाई मुलधारमा ल्याउनको लागि क्षमता अभिवृद्धि जस्ता कार्यक्रमहरु निरन्तर गर्दै आइरहेकी छिन् । सांसद चौधरीको पहलकदमीमा महिला मैत्री समाजबाट महोत्तरी, सर्लाही, भक्तपुर र चितवनमा सयभन्दा बढी महिलाहरुलाई सिलाईकटाई सम्बन्धी तालिम दिइएको छ भने तालिम पाउने ती सबै महिला लाभान्वित भएका छन् । त्यसैगरी सयौँ महिलाहरु ‘ब्यूटीसियन’सम्बन्धी तालिम प्राप्त गर्न सफल भएका छन् ।

सांसद चौधरीका अनुसार देशको हरेक जिल्लामा सिमांतकृत महिलाहरुलाई स्वाबलम्बी बनाउनको निमित्त यस्ता सिपमुलक तालिमहरुको आयोजना गर्ने लक्ष्य सांसद चौधरीको रहेको छ । त्यसैगरि प्राकृतिक प्रकोपको बेला समेत समस्यामा परेका जनताहरुलई चैधरीले राहत वितरण गरी सहयोग गर्ने गरेकी छिन् ।

नेपालका विपन्न महिलाहरुको समग्र रुपमा उत्थान गर्नु र तिनीहरुलाई आत्मनिर्भर बनाउनु सांसद एवं समाजसेवी चौधरीको परम लक्ष्य रहेको छ । त्यसैगरी नेपाल भारत महिला मैत्री समाज नेपाल र भारतको ऐतिहासिक सम्बन्धमा प्रगाढता बढाउनको निमित्त विभिन्न कार्यक्रमहरु गर्दै आइरहेको छ ।