लोकतन्त्र र मुलुकको रक्षा गर्नु कांग्रेसको दायित्व : नेता पौडेल

लोकतन्त्र र मुलुकको रक्षा गर्नु कांग्रेसको दायित्व : नेता पौडेल


नेपाली कांग्रेसका वरिष्ठ नेता रामचन्द्र पौडेलले लोकतन्त्र, राष्ट्रियता, सुशासन, शान्ति सुरक्षा र विकासका सवालमा सम्पूर्ण पार्टी एक भएर अगाडि बढ्नुपर्ने बताएका छन् ।

प्रेस युनियन चितवन शाखाले शुक्रबार चितवनमा आयोजना गरेको पत्रकार भेटघाट कार्यक्रममा वरिष्ठ नेता पौडेलले जनताका समस्या देखिएका ठाउँमा कांग्रेसले आवाज उठाउने बताए । उनले सरकार ठीक बाटोमा आउँदैन भने ठीक ठाउँमा ल्याउन कांग्रेस कम्मर कसेर अगाडि बढ्ने उल्लेख गरे । उनले भने, ‘जनताका आवाजलाई सधैँ दबाउन सकिदैन, देशका समस्यामा लापरबाही गर्न पाइँदैन र त्यसका लागि प्रतिपक्षले भूमिका निर्वाह गर्छ ।’

वरिष्ठ नेता पौडेलले भने, ‘देशका समस्यामा लापरबाही भए जनताले पनि आफ्नोतर्फबाट आवाज उठाउँछन् र सरकारलाई सही बाटोमा हिँडाउनलाई जबर्जस्ती प्रयास हुन्छन् ।’ दूरदराजका जनताले पनि स्वास्थ्य सुविधा पाउनुपर्छ भन्ने डा. गोविन्द केसीका मागप्रति सरकारले बेवास्ता गरेको बताउँदै पौडेलले भने, ‘दूरदराजमा रहेका जनतालाई पनि गुणस्तरीय स्वास्थ्य सेवा प्राप्त हुनुपर्छ । संविधानले समाजवादउन्मुख व्यवस्था भनेको छ । त्योअनुरूप सबै विपन्न जनताले सेवा पाउनुपर्छ भन्ने उहाँको मागलाई सरकारले बेवास्ता गरेको छ ।’ उनले अगाडि थपे, ‘त्यो संविधानविपरीत पनि छ ।’

गिरिजाप्रसाद श्वासप्रश्वास केन्द्र र सुशील कोइराला क्यान्सर अस्पताललाई पनि सरकारले लगभग विघटन गर्न लागेको भन्दै पौडेलले सरकार दुईवटा अस्पताल खारेजी गर्न उन्मुख बनेको बताए ।

वाइडबडी, सुनकाण्ड, भ्रष्टाचारका काण्ड अगाडि आइरहेको भन्दै उनले सरकार यस्ता घटनाको ढाकछोप गर्न लागेको आरोप लगाए । पार्टीभित्रको विवाद मिलेको हो भन्ने प्रश्नमा नेता पौडेल पार्टीभित्र केही कुरामा फरक मत भई नै रहने उल्लेख गरे । उनले भने, ‘केही कुराहरू नेतृत्वको गतिविधिलाई मन नपरेको हुन सक्छ । ती विवाद हुँदाहुँदै पनि पार्टी अहिलेका लोकतन्त्र, राष्ट्रियता र सुशासनको सवालमा एक हुन्छ ।’ महासमिति बैठकले एकताको सन्देश दिएको बताउँदै उनले भने, ‘त्यो कुरा तलसम्म आउनुपर्छ । लोकतन्त्र र मुलुकको रक्षा गर्नु कांग्रेसको दायित्व हो ।’