ठेक्का बदरको माग गर्दै प्रदर्शनमा उत्रिए साधुसन्त





हेमशंकर सिंह, राजविराज

मन्दिरको पोखरी नगरपालिकाले ठेक्का लगाएपछि ठेक्का बदरको माग गर्दै साधुसन्तहरुले विहिबार खडक नगरपालिकामा प्रदर्शन सहित धर्ना दिएका छन् ।

साविक खोजपुर गा.वि.स. वडा नं. ५ खेसराहा हाल खडक नगरपालिका वडा नं. ८ स्थित रामजानकी मन्दिर कलवारी व्यवस्थापन समिति मातहतमा रहेको पोखरी नगरपालिकाले ठेक्का लगाएपछि साधु सन्तहरु प्रदर्शनमा उत्रेका हुन् ।

मन्दिरको साविकको महन्थ स्व. दुखनी देवी दासको नाममा २००४ सालको नम्बरी प्रकाशनमा रहेको सो पोखरी रामजानकी मन्दीरले भोगचलन गर्दै आएको थियो । तर पनि नगरपालिकाले पोखरी ठेक्कामा लगाएपछि प्रमाणसहित नगरपालिकामा निवेदन दिए पनि सोको वास्ता नगरी एकतर्फी रुपमा ठेक्का लगाएकाले आन्दोलनमा उत्रिनु परेको मन्दिर व्यवस्थापन समितिका विन्देशवरी कलवारले बताए ।

उक्त पोखरी यसअघिको वर्षमा मन्दिरले नै ठेक्का लगाए पनि नगरपालिकाले लगाएको दोहरो ठेक्का वदरको माग साधुसन्तहरुले गरेका छन् । पोखरीकै आम्दानीवाट मन्दिरको पूजाआजा कार्य भइरहेको भन्दै उनीहरुले ठेक्का बदरका लागि गएको मंसिर २७ गते सञ्चालक समिति र स्थानीय भद्र भलादमीको बैठक बसी मंसिर २८ गते नगरपालिकामा निवेदन दिए पनि ठेक्का वदर नभएपछि आफुहरु आन्दोलनमा उत्रिन बाध्य भएको अध्यक्ष कलवारले बताए ।

ठेक्का बदर नहुन्जेल आफुहरुको शान्तिपूर्ण जारी रहने जानकारी समेत उनले दिएका छन् । हिन्दु बाहुल्य रहेको सो वडा र नगरपालिकाको अध्यक्षमा संघीय समाजवादी फोरम नेपालबाट मो. ईसराईल मिया र मेयरमा फोरम नेपालकै हेमायू हक निर्वाचित भएका छन् ।

सो सम्बन्धमा वडाअध्यक्ष मियाले भने उक्त पोखरी मन्दिरको नभई सार्वजनिक रहेकाले ठेक्का लगाइएको दाबी गरे ।

प्रतिक्रिया