कुर्दमाथि आक्रमण नगर्न टर्कीमाथि ट्रम्पको चेतावनी

कुर्दमाथि आक्रमण नगर्न टर्कीमाथि ट्रम्पको चेतावनी


सिरियाबाट अमेरिकी सैनिक फिर्ता भएसँगै टर्कीले कुर्दिस सैन्यबलमाथि आक्रमण गरे टर्कीले भयानक आर्थिक क्षति भोग्नुपर्ने चेतावनी अमेरिकाका राष्ट्रपति डोनाल्ड ट्रम्पले दिएका छन् । उनले कुर्दहरुलाई संयम अपनाउन र टर्कीलाई ‘उत्तेजित नबनाउन’ पनि आग्रह गरेका छन् ।

राष्ट्रपति ट्रम्पले गत डिसेम्बरमा सिरियाबाट अमेरिकी सैनिक फिर्ता हुने आकस्मिक घोषणा गरेका थिए । सिरियामा करिब दुई हजार अमेरिकी सैनिक रहेको विश्वास गरिन्छ ।

सिरियाबाट सैन्य फिर्ताका कारण उत्पन्न हुनसक्ने सुरक्षा चुनौतीका बारेमा हालका दिनमा राष्ट्रपति ट्रम्पले फुकीफुकी ट्वीट गरिरहेका छन् ।

राष्ट्रपति ट्रम्पका उच्च कुटनीतिज्ञ अमेरिकी विदेशमन्त्री माइक पोम्पेओ अहिले मध्यपूर्वका मुलुकहरुको भ्रमणमा छन् । अमेरिकी समर्थन प्राप्त सिरियाली कुर्दिस गठबन्धनको भविष्यका बारेमा अमेरिका र टर्कीबीच उत्पन्न पछिल्लो तनावलाई मत्थर बनाउन विदेशमन्त्री पोम्पेओले क्षेत्रका नेताहरुसँग परामर्श गरिरहेका छन् ।

सिरियाली कुर्दिसले इस्लामिक स्टेट्स विरुद्धको लडाइँमा अमेरिकी नेतृत्वको फौजलाई सहयोग गरेको थियो । एएफपीका अनुसार सिरियाली कुर्दिस लडाकूहरु अमेरिकी फौजको फिर्तीसँगै आफूहरुमाथि टर्कीले सैन्य कारबाही गर्ने भयमा छन् ।

अमेरिकी समर्थन प्राप्त कुर्दिस लडाकूको सुरक्षालाई ध्यान दिएर मात्र अमेरिकी सैनिक फिर्ता हुने बताएपछि टर्कीले त्यसप्रति कडा आपत्ति जनाएको छ । टर्कीले कुर्दिस लडाकू समूहलाई आतङ्ककारीको रुपमा व्यवहार गर्दछ ।

“कुर्दमाथि आक्रमण गरिए टर्कीले गम्भीर आर्थिक क्षति व्यहोर्नुपर्नेछ,” ट्रम्पले ट्वीटमा भनेका छन् । उनले कुर्दिस लडाकूका लागि ३० किलोमिटरको सुरक्षित क्षेत्र बनाउने प्रस्ताव अघिसारेका छन् ।

सुरक्षित क्षेत्र बनाउने बारेमा उनले विस्तृत विवरण सार्वजनिक गरेका छैनन्। खासगरी, यस्तो क्षेत्र बनाउँदा लाग्ने खर्च कसले व्यहोर्छ भन्ने प्रस्ट भएको छैन ।

इस्लामिक स्टेट विरुद्ध अमेरिकी नेतृत्वको सैनिक कारबाहीमा कुर्दिसको प्रभुत्व रहेको सिरियन डेमोक्रेटिक फोर्सेज (एसडीएफ)ले मद्दत गरेको थियो । एसडीएफको गठन नै कुर्दिस्तान वर्कर्स पार्टी (पीकेके)सँग निकट सम्बन्ध रहेको वाइपीजीले गरेको छ । वाइपीजीलाई टर्कीले आतङ्ककारी समूहको संज्ञा दिने गरेको छ ।

पीकेकेले स्वतन्त्र राष्ट्रको माग गर्दै दशकौंदेखि टर्की विरुद्ध छापामार युद्ध चलाइरहेको छ ।