काठमाडौं महानगरपालिका– २७ कमलाक्षी, असनमा केन्द्रीय कार्यालय रहेको एलाइभ बचत तथा ऋण सहकारी संस्था लिमिटेडले शनिबार आफ्नो दशौँ वार्षिक साधारणसभा सम्पन्न गरेको छ ।

सुन्धारास्थित धरहरा फुडल्यान्डमा सम्पन्न साधारणसभाले आगामी चार वर्षका लागि शंकर बस्नेत सञ्चालक रहेको सञ्चालक समिति गठन गरेको छ । सञ्चालक समितिमा उपाध्यक्ष दलबहादुर श्रेष्ठ चयन भएका छन् भने अन्य पाँच सञ्चालकमा सुनील केसी, उमेश खड्का, दीनानाथ रेग्मी, ओमकृष्ण आचार्य र अप्सरा राउत निर्विरोध चयन भएका छन् ।

तीन सदस्यीय लेखा सुपरीवेक्षण समितिको संयोजकमा सहकारीका सेयर सदस्य राजु केसी तथा सेयर सदस्यद्वय ज्योति जीसी र अनिता थापा खत्री सदस्यमा निर्विरोध चयन भएका छन् ।

साधारणसभामा सहकारीका अध्यक्ष अशोक रिजालले आर्थिक वर्ष २०७४–७५ को वार्षिक प्रतिवेदन र लेखा प्रतिवेदन सुपरीवेक्षण समितिका सुनिल केसीले प्रतिवेदन पेस गरेका थिए । दुवै प्रतिवेदन सभामा अनुमोदन भएका थिए ।

संस्थाले आर्थिक वर्ष २०७४–७५ सम्ममा २ करोड ४९ लाख ७५ हजार ८ सय रुपैयाँ सेयर पुँजी संकलन गरी ९ करोड ११ लाख ४६ हजार ७९१ रूपैयाँ निक्षेप संकलन गरेको थियो । सोही अवधिमा संस्थाले १२ करोड १८ लाख ५४ हजार ९६ रुपैयाँ कर्जा प्रवाह गरेको सो अवसरमा जानकारी गराइयो ।

संस्थाका अध्यक्ष अशोक रिजालको सभापतित्वको सम्पन्न साधारणसभामा करिब पाँच सय सेयर सदस्यहरूले सहभागिता जनाएका थिए । सो अवसरमा त्यस क्षेत्रका क्रियाशील अन्य सहकारीका अध्यक्ष तथा प्रतिनिधिहरूले साधारणसभाको सफलताका लागि शुभकामना मन्तव्य दिएका थिए ।