तनहुँमा यस वर्ष २५ करोड रुपैयाँबराबरको सुन्तला उत्पादन हुने अनुमान गरिएको छ । सुन्तला खेतीका लागि यस वर्ष मौसम अनुकूल भएको र उत्पादन क्षेत्र बढेकाले सुन्तला उत्पादनमा वृद्धि आउने अनुमान गरिएको हो ।

कृषि ज्ञान केन्द्र तनहुँका सूचना अधिकारी ज्योति क्षेत्रीले गत वर्ष तनहुँबाट १८ करोड रुपैयाँको सुन्तला उत्पादन भएकोमा यस वर्ष रु २५ करोडबराबरको सुन्तला उत्पादन हुने प्रक्षेपण गरिएको जानकारी दिए ।

अघिल्लो वर्ष ६ हजार ५ सय २६ मेट्रिक टन सुन्तला उत्पादन भएकोमा यस वर्ष ६ हजार ९ सय ३८ मेट्रिकटन सुन्तला उत्पादन हुने अनुमान गरिएको छ । तनहुँमा यस वर्ष एक हजार २८ हेक्टर क्षेत्रफलमा सुन्तला खेती गरिएको छ । तनहुँमा उत्पादित सुन्तला पोखरा, काठमाडौं, चितवनलगायतका ठाउँमा निर्यात हुँदै आएको छ ।

तनहुँको राइपुर, बैदी, छिपछिपे, तनहुँसुर, बेनीकोट, बन्दीपुर, घाँसीकुवा, नाम्सीकोट, भानुमतिलगायत सुन्तला खेतीको पकेट क्षेत्र हुन् । तनहुँको म्याग्दे गाउँपालिका–२ का विश्वबहादुर अधिकारी र निर्मल अधिकारीले यस वर्ष सुन्तला बेचेर रु. ५५ लाख आम्दानी गरेका छन् । संयुक्त रूपमा सुन्तला खेती गर्दैै आएका उनीहरूले यस वर्ष जिल्लामै सबैभन्दा बढी सुन्तला बिक्री गरेका हुन् ।

सोही ठाउँका सुकनारायण श्रेष्ठले पनि यस वर्ष ३१ लाख रुपैयाँको सुन्तला बिक्री गरेका छन् । भीमाद नगरपालिका–९ का अध्यक्ष इमानसिंह थापाले भानुमतिबाट यस वर्ष रु. दुई करोडबराबरको सुन्तला उत्पादन हुने अनुमान गरिएको जानकारी दिए ।

व्यास नगरपालिका–११ तनहुँसुरमा रु. ५० देखि ६० लाखसम्मको सुन्तला उत्पादन हुने अनुमान गरिएको कृषि शाखाका प्राविधिक विश्वराज वाग्लेले बताए । उनका अनुसार व्यास नगरपालिका–१३ वेनीकोटबाट समेत रु. एक करोड ५० लाखको सुन्तला उत्पादन हुने लक्ष्य छ ।

देवघाट गाउँपालिकामा भने यस वर्ष सुन्तला उत्पादनमा कमी आउने अनुमान गरिएको छ । गाउँपालिकाका कृषि शाखाका प्राविधिक आनन्दराज घिमिरेले असिना र खडेरीको कारण सुन्तला उत्पादन कमी हुन सक्ने बताए । उनका अनुसार गत वर्ष त्यहाँ रु. दुई करोडभन्दा बढीको सुन्तला उत्पादन भएको थियो ।