भारतको मेघालय राज्यमा अवैध रूपमा सञ्चालन हुँदै आएको एक कोइला खानीमा बाढी पसेपछि कम्तीमा १३ जना कामदार बेपत्ता भएका छन् । खानीको अत्यन्त साँघुरो सुरुङमा बाढी पसेका कारण कामदार भित्रै थुनिएकाले उनीहरूको मृत्यु हुन सक्ने आशंका गरिएको छ ।
अन्य दर्जनौँ कामदारले बाढीको पानी फाल्न कोसिस गरिरहेका छन् । मेघालयमा भएको वर्षापछि बिहीबार बिहान सबेरै खानीमा पानी पसेको थियो । खानीमा बेपत्ता भएकाको खोजी र उद्धारकार्य जारी रहेको स्थानीय प्रहरी अधिकारी लेथिन्द्रा संगमाले जानकारी दिए ।
भारतको एक अदालतले सन् २०१४ पछि सो इलाकामा कोइला खानी खोल्न प्रतिबन्ध लगाएको थियो । वातावरणकर्मीहरूले पानी दूषित हुनुको प्रमुख कारण नै यी कोइला खानीहरू रहेको भन्दै खानीमा प्रतिबन्ध लगाउन माग गरिरहेका थिए ।
सरकारी प्रतिबन्धका बाबजुद त्यस इलाकामा अवैध रूपमा अव्यवस्थित कोइला खानी सञ्चालन हुने क्रम जारी रहेको सरकारी अधिकारीको भनाइ छ ।
प्रतिक्रिया