भारतीय कंग्रेस पार्टीका प्रख्यात नेता कमलनाथले यही डिसेम्बर १७ मा मध्यप्रदेशको मुख्यमन्त्रीको शपथ लिने भएका छन् । डिसेम्बर १३ मा मध्यप्रदेशको मुख्यमन्त्री नियुक्त भएका कमलनाथले ‘लाल परेड ग्राउन्ड’मा शपथग्रहण लिने समाचारमा जनाइएको छ ।

मध्यप्रदेशको कंग्रेस समिति (एमसीसी) का अध्यक्षसमेत रहेका कमलनाथलाई मुख्यमन्त्री बनाउने निर्णय बिहीबार अबेर राति घोषणा भएको थियो । हालै सम्पन्न विधान सभाको निर्वाचनमा कंग्रेस पार्टीको विजयपछि कमलनाथलाई मुख्यमन्त्रीमा प्रस्ताव गरिएको हो ।

यसअघि भारतीय जनता पार्टी (बीजेपी) का नेता शिवराज सिंह चौहान तीनपटकसम्म लगाताार सो राज्यको मुख्यमन्त्री रहेका थिए ।

आफ्नो राजनीतिक यात्रा शुरु भएयता ७२ वर्षीय कंग्रेस नेता कमलनाथ पहिलोपटक मुख्यमन्त्रीमा नियुक्त भएका हुन् । उनी कंग्रेस पार्टीको तर्फबाट मध्यप्रदेशमा नौपटकसम्म सांसद भएका थिए ।

यसअघि पनि उनले भारतका पूर्वप्रधानमन्त्री डा. मनमोहन सिंहको मन्त्रिमण्डलमा दुई पटकसम्म उद्योग र यातायतमन्त्रीको जिम्मेवारी सम्हालिसकेका छन् ।

मध्यप्रदेशमा भएको निर्वाचनमा कंग्रेसले १ सय १४ सिटमा विजय प्राप्त गरेको छ । बहुमत प्राप्त गर्नको लागि कंग्रेसको दुई सिट मात्र कम भएको थियो ।