सत्तारुढ सङ्घीय समाजवादी फोरम नेपालको एकताको प्रथम राष्ट्रिय महाधिवेशन वैशाखको अन्तिम साता हुने भएको छ । पार्टीको केन्द्रीय समितिको आइतबार सम्पन्न बैठकले वैशाख २८, २९ र ३० गते महाधिवेशन गर्ने निर्णय गरेको हो ।

उपेन्द्र यादव नेतृत्वको सो पार्टीको बैठकले प्रदेश अधिवेशनको कार्यविधि र निर्देशिकालाई पनि पारित गरेको छ ।

बैठकले आगामी चैत २० गतेसम्म पार्टीको प्रदेश अधिवेशन सक्ने तथा वैशाखको पहिलो हप्ताभित्र प्रादेशिक भेला आयोजना गर्ने निर्णय गरे पनि महाधिवेशनको स्थान भने टुङ्गो लागेको छैन ।

पार्टीका सहअध्यक्ष राजेन्द्र श्रेष्ठका अनुसार वैशाखको पहिलो हप्ता ६ र वैशाख ९ र १० गते प्रदेश नं ३ गरी सातै प्रदेशको भेला सम्पन्न गरिने छ । पार्टी बैठकले सरकारसँग समन्वय गर्न उपप्रधानमन्त्री एवं स्वास्थ्य तथा जनसङ्ख्यामन्त्री समेत रहेका पार्टी अध्यक्ष उपेन्द्र यादवको संयोजकत्वमा ६ सदस्यीय समिति गठन गरेको छ । समितिको सदस्यमा पार्टीका वरिष्ठ नेता अशोक राई, सहअध्यक्ष राजेन्द्र श्रेष्ठ, उपाध्यक्षद्वय रकम चेम्जोङ र रेणु कुमारी यादव र महासचिव रामप्रसाद यादव रहेका छन् ।

यो समितिले सरकारको काम, विकास निर्माणसम्बन्धी काम, संवैधानिक आयोगमा नियुक्ति तथा सङ्घीय र प्रदेश सरकारबीच समन्वयको काम गर्ने बताइएको छ ।

समाजवादी फोरमले विभिन्न राजनीतिक दलसँग एकताका लागि वार्ता गर्न सहअध्यक्ष राजेन्द्र श्रेष्ठको संयोजकत्वमा वार्ता कार्यदल पनि गठन गरेको छ । कार्यदलमा उपाध्यक्ष चेम्जोङ, महासचिव शाह, उपमहासचिव प्रकाश अधिकारी र शहरी विकासमन्त्रीसमेत रहेका पार्टी सचिव मोहम्द इस्तियाक राई सदस्य रहनुभएको छ ेका छन् ।