प्रधानमन्त्रीद्वारा आगामी बजेटमा ज्येष्ठ नागरिक भत्ता बढाउने प्रलोभन

प्रधानमन्त्रीद्वारा आगामी बजेटमा ज्येष्ठ नागरिक भत्ता बढाउने प्रलोभन


चुनावमा गरेको प्रतिबद्धता पूरा नगरेको भन्दै आलोचना खेप्दै आएको सरकारका प्रमुख केपी शर्मा ओलीले आगामी बजेटमा ज्येष्ठ नागरिकको भत्ता बढाइने प्रलोभन दिएका छन् । आफ्नो सरकार गठन हुँदा मुलुकको ढुकुटी रित्तो अवस्थामा रहेका कारण चालू वर्ष ज्येष्ठ नागरिक भत्ता बढाउन नसकेको तर्क प्रधानमन्त्री ओलीले गरेका छन् ।

दशैँका अवसरमा नेकपा झापा जिल्ला कमिटीद्वारा विहिबार बिर्तामोडमा आयोजित शुभकामना आदानप्रदान कार्यक्रममा प्रम ओलीले भने, ‘भनेजस्तो भएन भनेर ज्येष्ठ नागरिकलाई नरमाइलो लागिरहेको होला, आउँदो बजेटमा हामी भत्ता बढाइहाल्छौँ ।’

देशलाई सुशासन र समृद्धिको बाटोमा अघि बढाउने आफ्नो मुख्य सङ्कल्प भएको उल्लेख गर्दै उनले जनताको अपेक्षा र विश्वासलाई तलमाथि पर्न नदिने बताए । ‘मैले कर्तव्य बुझेको छु, नाकमा कालो लाग्न दिन्नँ’, उनले भने ।

कार्यक्रममा अर्थमन्त्री डा युवराज खतिवडा, प्रदेश नं. १ का मुख्यमन्त्री शेरधन राई, प्रदेश सरकारका आन्तरिक मामिला तथा कानून मन्त्री हिक्मत कार्कीलगायतको उपस्थिति थियो ।