उज्ज्वल तारा स्कुल काँडाघारीले वडा दशैँको अवसरमा असोज २७ गते शनिबार दोस्रो ‘दशैँ रन फर गुड हेल्थ’ प्रतियोगिता गर्ने भएको छ । कागेश्वरी मनोहरा नगरपालिका, मेगा बैंक, हाम्रो मेलमिलाप सहकारी संस्था तथा फिटनेस च्वाइसको सहयोगमा सो दौड आयोजना हुन लागेको हो ।

स्वास्थ्यबारे सचेतना, मनोरञ्जन तथा बडादशैँको शुभकामना आदानप्रदान गर्ने उद्देश्यसहित विद्यालय प्रांगणबाट शुरु गरिने सो दौड महिलाका लागि ३ किलोमिटर तथा पुरुषहरूका लागि ५ किलोमिटरको दूरी निर्धारण गरिएको छ ।

विद्यालयका संस्थापक सल्लाहकार तथा कार्यक्रम संयोजक नेपाली सेनाका कर्णेल विष्णुबहादुर कार्कीका अनुसार सो दौडमा १५ वर्षदेखि माथिको उमेरका महिला तथा पुरुषले भाग लिन सक्नेछन् । कर्णेल कार्कीका अनुसार सो दौडमा अभिभावक तथा वर्तमान या सेवानिवृत्त सुरक्षाकर्मीसमेतले भाग लिन पाउनेछन् । यसैगरी महिला तथा पुरुषका लागि ५ किलोमिटरसम्म हिँड्ने प्रतियोगिता पनि समावेश गरिएको छ ।

प्रतियोगितात्मक सो दौडका १७ वटा विधामा पहिलो, दोस्रो र तेस्रो हुनेलाई ट्रफी, पदक र प्रमाणपत्र प्रदान गरिने आयोजकले जनाएका छन् । यसका लागि ५१ वटा ट्राफिकको व्यवस्था मिलाइएको छ ।

यसै सिलसिलामा असोज २३ गते मंगलबार उज्ज्वल तारा स्कुलमा काँडाघारी क्षेत्रका सुरक्षाकर्मी, खेलकुदसँग सम्बन्धित संघसंस्था तथा स्थानीय जनप्रतिनिधिहरूलाई सहभागी गराई छलफल कार्यक्रमको आयोजना गरिएको छ । छलफलमा संयोजक कर्णेल कार्कीले दौडका विविध पक्ष तथा सुरक्षा र प्रतियोगिताका सहभागीको स्वास्थ्यसँग सम्बन्धित विविध विषयमा प्रकाश पारेका थिए ।